മുംബയ്: കോവിഡ്-19 വൈറസ് വ്യാപിക്കുന്നത് നിയന്ത്രിക്കാൻ ഐ.പി.എല്ലിന്റെ പതിമൂന്നാം സീസൺ മൂന്നാഴ്ചത്തേക്ക് മാറ്റി വയ്ക്കാൻ ബി.സി.സി.ഐ തീരുമാനമെടുത്തു.‌

മാർച്ച് 29ന് ആരംഭിക്കേണ്ടിയിരുന്ന മത്സരങ്ങൾ ഏപ്രിൽ 15ലേക്കാണ് മാറ്റിയത്. ഇക്കാര്യം ഔദ്യോഗികമായി ഉടൻ പ്രഖ്യാപിക്കും.

കോവിഡ്-19 നിയന്ത്രണ വിധേയമാക്കാൻ വിസ റദ്ദാക്കിയതുൾപ്പടെ കേന്ദ്ര സർക്കാർ കർശന നടപടികൾ സ്വീകരിച്ച സാഹചര്യത്തിൽ 2020ലെ ഐ.പി.എൽ മത്സരങ്ങൾ അനിശ്ചിതത്വത്തിലായിരുന്നു. വിസ റദ്ദാക്കലോടെ ഐ.പി.എല്ലിൽ വിദേശ താരങ്ങളുടെ പങ്കാളിത്തം സംശയത്തിലായി. പല ടീമുകളിലായി നിരവധി വിദേശ താരങ്ങൾ ഐ.പി.എൽ കളിക്കുന്നുണ്ട്.ഈ മാസം 29ന് ചെന്നൈ സൂപ്പർ കിംഗ്സും മുംബയ് ഇന്ത്യൻസും തമ്മിലായിരുന്നു ഉദ്ഘാടന മത്സരം നിശ്ചയിച്ചിരുന്നത്. മുംബയിലെ വാംഖഡെ സ്റ്റേഡിയമായിരുന്നു മത്സരവേദി.