കൊറോണ വൈറസിനെ തടയാൻ പലവിധ മാർഗങ്ങൾ സോഷ്യൽമീഡിയിയിലൂടെയും മറ്റും വ്യാപകമായി പ്രചരിക്കുന്നുണ്ട്. ഇതിലെ നേരും നുണയും തിരിച്ചറിയണമെന്ന് ആരോഗ്യ വിദഗ്ദ്ധർ ചൂണ്ടിക്കാട്ടുന്നു.
ഹാന്റ് ഡ്രൈയർ കൊറോണാ വൈറസിനെ കൊല്ലും
ഇല്ല. പ്രയോജന രഹിതം. കൈകൾ ഇടയ്ക്കിടെ വൃത്തിയാക്കിയ ശേഷം ഡ്രൈയർ ഉപയോഗിച്ച് ഉണക്കാമെന്നു മാത്രം.
ശരീരത്തിൽ ക്ലോറിൻ അല്ലെങ്കിൽ ആൾക്കഹോൾ സ്‌പ്രേ ചെയ്താൽ വൈറസിനെ നശിപ്പിക്കാം
തെറ്റ്. ഇത്തരം വസ്തുക്കൾ കണ്ണിലും മൂക്കിലും എത്തിയാൽ അപകടമായേക്കും. പക്ഷേ ഇവ രണ്ടും ആരോഗ്യപ്രവർത്തകരുടെ നിർദ്ദേശാനുസരണം ഡിസ്ഇൻഫെക്ടന്റ് ആയി ഉപയോഗിക്കാം.
അൾട്രാവയലറ്റ് ഡിസ്ഇൻഫെക്ഷൻ ലൈറ്റ് വൈറസിനെ ഇല്ലാതാക്കും
ഇല്ല, ഇത് ചിലപ്പോൾ തൊലിപ്പുറത്ത് അസ്വസ്ഥത ഉണ്ടാക്കിയേക്കും.
വെളുത്തുള്ളി കഴിച്ചാൽ, രസം കുടിച്ചാൽ വൈറസ് ബാധ തടയാം
തെറ്റ്. രോഗ പ്രതിരോധത്തിന് നല്ലതാണ്.
ഗോമൂത്രം ചാണകം എന്നിവ ശരീരത്തിൽ പൂശുകയോ ഭക്ഷിക്കുകയോ ചെയ്താൽ വൈറസ് പമ്പകടക്കും.
ഒരിക്കലുമില്ല. അങ്ങനെ ചെയ്താൽ മറ്റു പല അസുഖങ്ങളും പിടിപെട്ടേക്കാം.
മൂക്കിൽ ഒഴിക്കുന്ന സലൈൻ തുള്ളിമരുന്ന് വൈറസിനെതിരെ ഫലപ്രദം
ഇല്ല. സാധാരണ ജലദോഷ ചികിത്സയിൽ ചെറിയ രീതിയിൽ പ്രയോജനകരം.
ചെറുപ്പക്കാർ, പ്രായമായവർ, കുട്ടികൾ എല്ലാവരെയും കൊറോണ ബാധിക്കും
എല്ലാ പ്രായത്തിലുള്ളവർക്കും പിടിപെടാനിടയുണ്ട്. എന്നാൽ പ്രായമേറിയവർക്കും മറ്റ് അസുഖങ്ങൾ ഉള്ളവർക്കും വൈറസ് ബാധ ഗുരുതരമായേക്കാൻ സാദ്ധ്യതയുണ്ട്.
തെർമ്മൽ സ്കാനർ ഉപയോഗിച്ച് കൊറോണ വൈറസ് ബാധയുള്ളവരെ കണ്ടെത്താനാകും.
പനിയുള്ളവരെ കണ്ടെത്താനാകും. എന്നാൽ വൈറസ് ബാധിച്ച എല്ലാവർക്കും ഉടനെ പനി ഉണ്ടാകണമെന്നില്ല. മാത്രമല്ല എല്ലാ പനികളും കൊറോണ മൂലം ആവണമെന്നുമില്ല.
രോഗബാധ തടയാൻ ഹോമിയോ, സിദ്ധ വിഭാഗത്തിൽ ചില പ്രത്യേക മരുന്നുകളുണ്ട്.
ഇല്ല. അങ്ങനെ യാതൊരു മരുന്നും ഇതുവരെ കണ്ടെത്തിയിട്ടില്ല. പുതിയ അസുഖമാണ് കൊറോണ. പഠനങ്ങൾ നടക്കുകയാണ്. ഇതൊന്നും അറിയാതെയുള്ള അവകാശവാദങ്ങൾ തള്ളിക്കളയണം.
രോഗം ചികിത്സിച്ച് ഭേദമാക്കാൻ പ്രത്യേക മരുന്നുകളുണ്ട്.
ഇതുവരെ ഇല്ല. രോഗലക്ഷണങ്ങൾ ഉള്ളവർക്ക് ചികിത്സയും ആവശ്യമെങ്കിൽ മികച്ച സപ്പോർട്ടീവ് സൗകര്യങ്ങളുമാണ് നൽകുക.
പട്ടി, പൂച്ച തുടങ്ങിയ വളർത്തുമൃഗങ്ങൾ അസുഖം പകരാൻ കാരണമാകും
മനുഷ്യരിൽ നിന്ന് മനുഷ്യരിലേക്ക് പകരാനുള്ള സാദ്ധ്യതയാണ് കൂടുതൽ.
ഒരു പട്ടിക്ക് അസുഖം ബാധിച്ചതായി റിപ്പോർട്ടുണ്ടായിരുന്നു. അതുകൊണ്ട് ജാഗ്രത വേണം. വളർത്ത് മൃഗങ്ങളെ സ്‌പർശിക്കുകയാണെങ്കിൽ കൈ നന്നായി കഴുകുക, വ്യക്തി ശുചിത്വം പാലിക്കുക.
കൊറോണ വൈറസ് ചികിത്സയ്ക്ക് ആന്റിബയോട്ടിക് പ്രയോജനപ്പെടുമോ ?
ഇല്ല, ആന്റിബയോട്ടിക് കൊറോണ വൈറസിന് എതിരെ പ്രവർത്തിക്കില്ല. എന്നാൽ വൈറസ് ബാധയോടൊപ്പം ബാക്ടീരിയ മൂലമുള്ള അണുബാധ ഉണ്ടെങ്കിൽ ആന്റിബയോട്ടിക് ആവശ്യമായേക്കാം.
അന്തരീക്ഷതാപനില കൂടിയ സ്ഥലങ്ങളിൽ കൊറോണ വൈറസ് പകരില്ല
അല്ല. അന്തരീക്ഷ താപനില ഉയർന്ന സ്ഥലങ്ങളിലും കൊറോണ വൈറസ് രോഗ വ്യാപനം ഉണ്ടായിട്ടുണ്ട്. നിലവിൽ ശാസ്ത്രീയ അടിത്തറ ഒന്നുമില്ലാത്ത ഒരു അഭിപ്രായമാണിത്.
മദ്യപിച്ചാൽ കൊറോണ വൈറസ് ബാധ തടയാനാകും
ഒരിക്കലുമില്ല. ഈഥൈൽ ആൾക്കഹോൾ അകത്താക്കിയാൽ പൂസാകാൻ സാദ്ധ്യതയുണ്ട്. കൂടിയ അളവിൽ മദ്യപിച്ചാൽ ബോധം മറയാനും ജീവന് അപകടകരമാകാനും ഇടയുണ്ട്.
ഇടയ്ക്കിടെ ചൂട് വെള്ളം കുടിച്ചാൽ കൊറോണ വൈറസ് വരില്ല
ഇല്ല, അങ്ങനെ എന്തെങ്കിലും പ്രയോജനം ഉള്ളതായി തെളിഞ്ഞിട്ടില്ല. എങ്കിലും തിളപ്പിച്ചാറ്റിയ വെള്ളം കുടിക്കുന്നത് ശരീരത്തിന് നല്ലതാണ്. .
വൈറസ് ബാധ മൂലം ശ്വാസകോശത്തിൽ ഫൈബ്രോസിസ് ഉണ്ടാകാൻ സാധ്യതയുണ്ട്. അത് പരിശോധിക്കാനായി പരമാവധി ശക്തിയിൽ ശ്വാസം ഉള്ളിലേക്കെടുത്ത് 10 സെക്കൻഡ് പിടിച്ചു വച്ചാൽ വൈറസ് ബാധ ഇല്ലെന്ന് വ്യക്തമാകും.
അല്ല, ഈ സന്ദേശം തെറ്റാണ്.
ഐസ്‌ക്രീം, തണുത്ത ഭക്ഷണ പദാർത്ഥങ്ങൾ എന്നിവ കഴിക്കരുത്.
രോഗമുള്ള വ്യക്തിയുടെ ശ്രവം നമ്മുടെ ശരീരത്തിൽ പ്രവേശിക്കുമ്പോഴാണ് രോഗം ഉണ്ടാവുന്നത്. ഐസ്‌ക്രീം കഴിച്ചാലും ഇല്ലെങ്കിലും അങ്ങനെതന്നെ.
ഉപ്പുവെള്ളം കൊണ്ട് തൊണ്ട ഗാർഗിൾ ചെയ്താൽ ടോൺസിൽ അണുക്കൾ നശിക്കും
തൊണ്ടവേദനയ്ക്ക് ഇങ്ങനെചെയ്യുന്നത് നല്ലതാണ്. കൊറോണയെ പ്രതിരോധിക്കാൻ ഈ മാർഗം വൈദ്യശാസ്ത്രം നിഷ്‌കർഷിക്കുന്നില്ല.
ന്യൂമോണിയ വാക്‌സിൻ സ്വീകരിച്ചവർക്ക് കൊറോണയ്ക്കെതിരെ പ്രതിരോധശേഷി ലഭിക്കും
ഇല്ല. കൊറോണ പുതിയ ഒരു അസുഖമാണ്. വാക്‌സിൻ കണ്ടെത്താൻ ഗവേഷകർ ശ്രമിച്ചുകൊണ്ടിരിക്കുന്നു.