പാലക്കാട്: സംസ്ഥാനത്ത് കൊറോണ ബാധിതരുടെ എണ്ണം വർദ്ധിക്കുന്ന സാഹചര്യത്തിൽ വയലിൽ കിടന്നുറങ്ങിയ ഫ്രഞ്ച് പൗരനെക്കണ്ട് നാട്ടുകാർ പരിഭ്രാന്തരായി. സൈക്കിളിൽ നാട് ചുറ്റാനിറങ്ങിയ ഇവാൻ ജാക്വറാണ് ജനങ്ങളിൽ ഭീതി സൃഷ്ടിച്ചത്. ഇന്നലെ രാവിലെയാണ് ഇവാനെ മന്ദത്തുകാവിനടുത്ത് വയലിൽ കിടന്നുറങ്ങുന്ന നിലയിൽ കണ്ടത്.

ഇയാൾ മരിച്ചുവെന്നാണ് ആദ്യം നാട്ടുകാർ കരുതിയത്. എന്നാൽ ഉറക്കമുണർന്നതോടെ കൊറോണ ബാധിതനാണോയെന്ന സംശയമായി. ഉടൻതന്നെ പൊലീസിനെ വിവരമറിയിക്കുകയായിരുന്നു. ആരോഗ്യവകുപ്പ് അധികൃതരും പൊലീസും ചേർന്ന് ഇയാളെ ജില്ലാ ആശുപത്രിയിലാക്കി.

പരിശോധനയിൽ അസുഖമൊന്നുമില്ലെന്ന് വ്യക്തമായെങ്കിലും ഇപ്പോഴും ആശുപത്രിയിലെ ഐസൊലേഷൻ വാർഡിൽ തുടരുകയാണ്. ജനുവരി 10നാണ് ഇയാൾ ഇന്ത്യയിലെത്തിയത്. തമിഴ്നാട് വഴിയാണ് പാലക്കാട്ടെത്തിയത്. സൈക്കിളിൽ കേരളം മുഴുവൻ ചുറ്റിക്കാണലായിരുന്നു ലക്ഷ്യം.