തമിഴ്‌നാട്: അവിനാശിയിലുണ്ടായ വാഹനാപകടത്തിൽ നാല് മെഡിക്കൽ വിദ്യാർത്ഥികളും ഡ്രൈവറും ഉൾപ്പെടെ അഞ്ച് പേർ മരിച്ചു. സേലം വിനായക മിഷൻ പാരമെഡിക്കൽ കോളേജിലെ വിദ്യാർത്ഥികളാണ് മരണപ്പെട്ടത്.വിദ്യാർത്ഥികൾ സഞ്ചരിച്ചിരുന്ന കാർ ലോറിയിലിടിച്ചാണ് അപകടമുണ്ടായത്. അവധിയെ തുടർന്ന് കോളേജിൽ നിന്നും ഊട്ടിയിലേക്ക് പോകുകയായിരുന്നു വിദ്യാർത്ഥികൾ. അപകടത്തിൽ മൂന്ന് പേർക്ക് ​ഗുരുതരമായി പരിക്കേറ്റു.

പാരാമെഡിക്കൽ വിദ്യാർത്ഥികളായ ഇളവരശൻ (21), രാജേഷ് (21), വെങ്കിടാചലം (21) ,വസന്ത് (21), എന്നീ വിദ്യാർഥികളും കാർ ഡ്രൈവറായ മണികണ്‌ഠനുമാണ് മരിച്ചത്. സംഘത്തിലുണ്ടായിരുന്ന സന്തോഷ് (22), കാർത്തിക് (21), ജയസൂര്യ (21) എന്നിവർക്കാണ് പരിക്കേറ്റത്.കഴിഞ്ഞ മാസം അവിനാശിയിലെ കോയമ്പത്തൂർ- ബെംഗളൂരു ദേശീയപാതയിൽ കെഎസ്ആർടിസിയുടെ വോൾവോ ബസിലേക്ക് കണ്ടെയ്നർ ലോറി ഇടിച്ചുണ്ടായ അപകടത്തിൽ 20 യാത്രക്കാർ മരണപ്പെട്ടിരുന്നു.