കോലാപൂർ: മഹാരാഷ്​ട്രയിൽ ബെെക്കിൽ സഞ്ചരിച്ച യുവാവ് പൊതുസ്ഥലത്ത്​ മുഖം മറയ്ക്കാതെ തുമ്മിയതിനെ തുടർന്ന് ആൾക്കൂട്ട മർദ്ദനം. കൊറോണ വെെറസ് ബാധ മറ്റുള്ളവരിലേക്ക്​ പകരുമെന്ന്​ പറഞ്ഞായിരുന്നു മർദ്ദനം. വ്യാഴാഴ്​ച വൈകീട്ട്​ കോലാപൂർ നഗരത്തിനടുത്ത്​ ഗുജാരിയിലാണ്​ ​ സംഭവം നടന്നത്. യുവാവിനെ ആൾക്കൂട്ടം നിരത്തിൽ ആക്രമിക്കുന്നതിന്റെ ദൃശ്യങ്ങളാണ് ഇപ്പോൾ പുറത്തുവരുന്നത്.

ബൈക്കിൽ സഞ്ചരിച്ച യുവാവ് തൂവാല ഉപയോഗിച്ച്​ മുഖം മറക്കാതെ തുമ്മിയെന്ന്​ പറഞ്ഞ്​ മറ്റൊരു ബൈക്കിലെത്തിയവർ ചോദ്യം ചെയ്യുകയായിരുന്നു. മുഖംമറയ്ക്കാതെ തുമ്മിയാൽ കൊറോണ വൈറസ് പടർന്നുപിടിക്കില്ലേയെന്നും യാത്രികൻ രണ്ടാമനോട് ചോദിക്കുന്നുണ്ട്. തുടർന്ന് ഇതിന്റെ പേരിൽ തർക്കം രൂക്ഷമാവുകയും തുമ്മിയയാളെ മർദ്ദിക്കുകയുമായിരുന്നു. കൈയ്യാങ്കളി രൂക്ഷമായതോടെ ഗതാഗതക്കുരുക്കുമുണ്ടായി.

തുടർന്ന്​ ആൾക്കൂട്ടം എത്തുന്നതും ഇയാളെ മർദ്ദിക്കുന്നതും സി.സി.ടി.വി ദൃശ്യങ്ങളിൽ കാണാം. ഇയാൾ പൊലീസിൽ പരാതി നൽകിയിട്ടില്ല. മഹാരാഷ്ട്രയിൽ 49 പേർക്കാണ്​ ഇതുവരെ രോഗം സ്ഥിരീകരിച്ചത്​. ഇത്​ ആളുകളിൽ പരിഭ്രാന്തി പരത്തിയിട്ടുണ്ട്​.