കൊറോണയുടെ പശ്ചാത്തലത്തിൽ ആരോപണ പ്രത്യാരോപണങ്ങൾ നടത്തുന്ന രാഷ്ട്രീയ പ്രവർത്തകരെ നാം കാണുന്നതാണ്. ഇതിൽ ശക്തമായ പ്രതികരണവുമായി രംഗത്ത് എത്തിയിരിക്കുകയാണ് ചലച്ചിത്ര താരം ഹരീഷ് പേരടി. കൊറോണക്കാലത്ത് സർക്കാരുകൾ എടുക്കുന്ന ന‌ടപടികൾക്ക് പൂർണ്ണ പിന്തുണ നൽകി ജനങ്ങൾ ഒപ്പം നിൽക്കണമെന്ന് ഹരീഷ് പേരടി ഫെയ്സ്ബുക്ക് പാേസ്റ്റിലൂടെ പറയുന്നു. വർഗീയത താണ്ഡവമാടിയകാലത്ത് നവോത്ഥാന മൂല്യങ്ങൾ സംരക്ഷിക്കാൻ ചങ്ങലവലിച്ച് ഒരുമിച്ച് നിന്നപോലെ ഇപ്പോൾ നടത്തുന്ന ബോധവൽക്കരണ പരിപാടികളും ലക്ഷ്യത്തിലേക്ക് എത്തിക്കാൻ ഏവരും ഒരുമിക്കണം.

ഹരീഷ് പേരടിയുടെ ഫേയ്സ്ബുക്ക് പോസ്റ്റിന്റെ പൂർണ്ണ രൂപം

ഒരു മഹാമാരിയുടെ മുന്നിൽ നിൽക്കുമ്പോൾ ട്രോളുകളും പൊങ്കാലകളും താരതമ്യ പഠനങ്ങളും ഒഴിവാക്കുക എന്നുള്ളത് മനുഷ്യന്റെ വിവേചന ബുദ്ധിയാണ്...അത് കാത്തുസുക്ഷിച്ചാൽ മാത്രമെ ഈ മഹാമാരിയെ നമുക്ക് അതിജിവീക്കാൻ സാധിക്കുകയുള്ളു...

വർഗ്ഗീയത താണ്ഡവമാടിയ കാലത്ത് നവോത്ഥാന മൂല്യങ്ങൾ സംരക്ഷിക്കാൻ ചങ്ങല വലിച്ചതു പോലെതന്നെയാണ് മഹാമാരിയുടെ ഭീകരതയെ ഓർമ്മപ്പെടുത്താൻ കർഫ്യൂ നടത്തുന്നതും ആരോഗ്യ പ്രവർത്തകർക്ക് ഐക്യദാർണ്ഡ്യം പ്രഖ്യാപിക്കാൻ കൈ കൊട്ടുന്നതും...

പ്രഹസനം എന്ന് തോന്നുന്ന ഇത്തരം ബോധവൽക്കരണങ്ങൾക്ക് ദുരന്തമുഖത്ത് ഏറെ പ്രസക്തിയുണ്ട്...നമ്മൾ മനുഷ്യർ ബാക്കിയായാൽ മാത്രമെ നാളെയും നമുക്ക് രാഷ്ട്രീയം കളിക്കാൻ പറ്റു...ഒന്ന് രാജ്യത്തിന്റെ പ്രധാനമന്ത്രിയാണ് ...ഒന്ന് സംസ്ഥാനത്തിന്റെ മുഖ്യമന്ത്രിയാണ്..

ഈ സമയത്ത് അത് മാത്രം ഓർക്കുകയെന്നുള്ളതാണ് നമ്മുടെ ഉത്തരവാദിത്വം ...കേന്ദ്ര സംസ്ഥാന സർക്കാറുകളുടെ നിർദേശങ്ങളും മുന്നറിയുപ്പുകളും പാലിക്കുക...എന്റെ നാടിനൊപ്പം..എന്റെ രാജ്യത്തിനൊപ്പം...എന്റെ ഭൂമിയിലെ മനുഷ്യർക്കൊപ്പം...