കാസർകോട്: കാസർകോട് ജില്ലയിൽ ഇന്ന് അഞ്ചു പേർക്ക് കൂടി കൊറോണസ്ഥിരീകരിച്ചു. ദുബായിൽ നിന്ന് വന്നവരാണ് പുതുതായി കൊറോണ സ്ഥിരീകരിച്ച അഞ്ചു പേരും. 58 ,27, 32, 41, 33 വയസ്സുള്ള ഇവർ അഞ്ചുപേരും പുരുഷൻമാരാണ്. നെല്ലിക്കുന്ന്, വിദ്യാനഗർ, ചന്ദ്രഗിരി, മരക്കാപ്പ് കടപ്പുറം, ചെങ്കള സ്വദേശികളാണ് ഇവർ.

കാസർകോട് ജില്ലയിൽ കൊറോണ രോഗം ബാധിച്ചവരുടെ എണ്ണം 19 ആയി ഉയർന്നു. കൊറോണ ദിവസവും ജില്ലയിൽ റിപ്പോർട്ട് ചെയ്യപ്പെടുന്ന സാഹചര്യത്തിൽ പൊതുജനങ്ങൾ ജാഗരൂകരായിരിക്കണമെന്നും ആരോഗ്യ പ്രവർത്തകരുടെ നിർദ്ദേശങ്ങൾ കർശനമായി പാലിക്കണമെന്നും ജില്ലാ മെഡിക്കൽ ഓഫീസർ ഡോ. എ.വി രാംദാസ് പറഞ്ഞു.

ജില്ലയിൽ 762 പേരാണ് നിരീക്ഷണത്തിൽ ഉള്ളത്. ആശുപത്രികളിൽ 41 പേരും നിരീക്ഷണത്തിലുണ്ട്. കാസർകോട് നുള്ളിപ്പാടിയിലെ കെയർവെൽ ആശുപത്രി, ജനറൽ ആശുപത്രി എന്നിവിടങ്ങളിലും ഐസോലേഷൻ സംവിധാനങ്ങൾ ഒരുക്കി. ജില്ലാ ആശുപത്രിയിലും ഐസോലേഷൻ സംവിധാനം വിപുലീകരിച്ചു വിദേശത്തുനിന്നും വന്നവരും അവരുമായി അടുത്തിടപഴകിയ വരും നിർബന്ധമായും വീടുകളിൽ നിരീക്ഷണത്തിൽ കഴിയുകയും കൊറോണ നിയന്ത്രണ സെല്ലുമായി ബന്ധപ്പെടുകയും ചെയ്യണം. കൊറോണ വൈറസ് സാമൂഹിക വ്യാപനം തടയുന്നതിനായി പൊതുജനസമ്പർക്കം ഒഴിവാക്കണമെന്നും ആരോഗ്യവകുപ്പ് അധികൃതർ പറഞ്ഞു.