കൊൽക്കത്ത : ബംഗാളിൽ പാൽ വാങ്ങാൻ പുറത്തിറങ്ങിയ യുവാവ് പൊലീസിന്‍റെ മർദനമേറ്റ് മരിച്ചു.ഹൗറാഹ് സ്വദേശി ലാൽ സ്വാമിയാണ് മരിച്ചത്. കൊറോണ വൈറസ് വ്യാപനത്തെ തുടര്‍ന്ന് രാജ്യമാകെ ലോക്ക് ഡൗണ്‍ ചെയ്തിരിക്കുന്ന സാഹചര്യത്തില്‍ ജനങ്ങള്‍ പുറത്തിറങ്ങരുതെന്ന് സര്‍ക്കാര്‍ കര്‍ശന നിര്‍ദ്ദേശം നൽകിയിരുന്നു. ഇത് ലംഘിച്ച് പാൽ വാങ്ങാൻ പുറത്ത് പോയ സമയത്താണ് ഇയാളെ പൊലീസ് മർദിച്ചത്.മർദനമേറ്റ ഇയാളെ ഉടൻ തന്നെ ആശുപത്രിയിൽ എത്തിച്ചെങ്കിലും മരണം സംഭവിച്ചിരുന്നു. പൊലീസ് മർദനത്തെ തുടർന്നാണ് തന്‍റെ ഭർത്താവ് മരിച്ചതെന്ന് ലാൽ സ്വാമിയുടെ ഭാര്യ പറഞ്ഞു. എന്നാൽ ലാൽ സ്വാമിയെ മർദിച്ചിട്ടില്ലെന്നും ഹ്യദയാഘാതം മൂലമാണ് മരണം സംഭവിച്ചത് എന്നുമാണ് പൊലീസിന്‍റെ വാദം. അതേ സമയം നിലവിൽ 10 പേർക്കാണ് ബംഗാളിൽ കൊറോണ രോഗം സ്ഥിരീകരിച്ചത്. ഒരാൾ മരണപ്പെടുകയും ചെയ്തു. ഇതോടെ ഇന്ത്യയിൽ 600 ൽ ഏറെ പേർക്ക് കൊറോണ സ്ഥിരീകരിക്കുകയും 16 പേർ മരണപ്പെടുകയും ചെയ്തു.