ന്യൂഡൽഹി: കൊറോണ വൈറസ് വ്യാപനം തടയുന്നതിന് ലോക്ക് ഡൗൺ പ്രഖ്യാപിച്ചതിന് പിന്നാലെ കൂടുതൽ പ്രതിരോധ മാർഗങ്ങളുമായി കേന്ദ്രസർക്കാർ. വൈറസ്​ വ്യാപനം തടയാൻ മൊബൈൽ ആപ്ലിക്കേഷനാണ് കേന്ദരം ഇപ്പോൾ പുറത്തിറക്കിയിരിക്കുന്നത്. ഇലക്​ട്രോണിക്​സ്​ ആൻഡ് ഐ.ടി മന്ത്രാലയവും ആരോഗ്യ മന്ത്രാലയവും ചേർന്നാണ് കൊറോണ കവച്​ എന്ന പേരിൽ ആപ്പ്​ പുറത്തിറക്കിയിരിക്കുന്നത്​. കൊറോണ വൈറസ്​ ബാധിച്ചവരെ മാത്രമല്ല അവരുമായി അടുത്തിടപഴകിയവരെയും പുതിയ ആപ്പ്​ ട്രാക്ക് ചെയ്​ത്​ കണ്ടെത്തുമെന്നാണ് അവകാശവാദം.

കൊറോണ കവചി​ന്റെ ബീറ്റാ വേർഷൻ ആൻഡ്രോയ്​ഡ്​ ഫോണുകൾക്കായി അവതരിപ്പിച്ചിട്ടുണ്ടെങ്കിലും ആപ്പിൾ ഫോണുകൾ ഉപയോഗിക്കുന്നവർക്ക് ഇനിയും കാത്തിരിക്കേണ്ടി വരും. ​

ജി.പി.എസ്​ സംവിധാനം ഉപയോഗിച്ചായിരിക്കും ആപ്പ്​ പ്രവർത്തിക്കുക. ആപ്പ്​ ഡൗൺലോഡ്​ ചെയ്​ത ആരെങ്കിലും കൊറോണ ബാധിച്ച ആൾ പോയ സ്ഥലത്ത്​ പോവുകയാണെങ്കിൽ ആപ്പ്​ ഒരു അലേർട്ട് നൽകും. ഇതുകൂടാതെ ഉപയോഗിക്കുന്നയാളുടെ ആരോഗ്യ സ്ഥിതി പരിശോധിക്കാനുള്ള സംവിധാനവും കൊറോണ കവചിലുണ്ട്​.

പച്ച, ബ്രൗൺ, മഞ്ഞ, ചുവപ്പ്​ നിറങ്ങളിലുള്ള സൂചകങ്ങൾ ഉപയോഗിച്ചായിരിക്കും ഉപയോക്താക്കളുടെ ആരോഗ്യസ്ഥിതി ആപ്പ്​ അളക്കുക. നമ്മൾ നല്‍കുന്ന വിവരങ്ങൾ അനുസരിച്ച്‌​ പച്ച സൂചകം കാണിച്ചുതരികയാണെങ്കിൽ പൂർണ ആരോഗ്യവാനെന്ന്​ അർത്ഥം. തവിട്ട്​ നിറമാണെങ്കിൽ ഡോക്​ടറെ കാണണമെന്നും മഞ്ഞയാണെങ്കിൽ എത്രയും പെട്ടന്ന്​ വീട്ടുനിരീക്ഷണത്തില്‍ കഴിയണമെന്നും അർത്ഥമാക്കുന്നു.

ഇനി ചുവപ്പാണ്​ കൊറോണ കവച്​ സൂചിപ്പിക്കുന്നതെങ്കിൽ നിങ്ങൾക്ക്​ കോവിഡ്​ 19 ബാധിച്ചുവെന്നും ഉറപ്പാക്കാം. അതേസമയം, കേന്ദ്ര ആരോഗ്യമന്ത്രാലയം പുറത്തുവിട്ടതാണെങ്കിലും ആപ്പി​ന്റെ പ്രൈവസി പോളിസി വ്യക്തമാകാത്ത വിധത്തിലാണ്​ നൽകിയിരിക്കുന്നത്​. ആരോഗ്യത്തിന്​ യാതൊരു പ്രശ്​നവുമില്ലെങ്കിൽ ആപ്പ്​ നിങ്ങളുടെ ഫോണി​ന്റെ ജി.പി.എസ്​ സംവിധാനം ഉപയോഗിക്കില്ലെന്ന്​ മാത്രമാണ്​ നൽകിയിരിക്കുന്നത്​. ആപ്പ്​ ഉപയോഗിക്കാൻ ഉപയോക്​താവി​ന്റെ ഫോൺ നമ്പറും ആവശ്യപ്പെടുന്നുണ്ട്​.

കൊറോണ വൈറസുമായി ബന്ധപ്പെട്ട എന്ത്​ വിവരങ്ങൾക്കും ഉപയോഗിക്കാv പറ്റുന്ന ഏറ്റവും മികച്ച രണ്ട്​ മാദ്ധ്യമങ്ങൾ നിലവിൽ - https://www.covid19india.org/ എന്ന സൈറ്റും വേൾഡ്​ ഹെൽത്ത്​ ഓർഗനൈസേഷ​​ന്റെ ആപ്പുമാണ്​.