ആലപ്പുഴ: കൊറോണ വൈറസ് വ്യാപനത്തെ തടയാൻ പ്രതിരോധ പ്രവർത്തനത്തിനുള്ള ഹാൻഡ് സാനിറ്റൈസറിന്റെ നിർമാണത്തിൽ റെക്കോഡ് വേഗവുമായി ആലപ്പുഴ കെ.എസ്.ഡി.പി. ശനിയാഴ്ച വരെ ഒമ്പതുലക്ഷം ബോട്ടിലുകളിലായി 4.5 ലക്ഷം ലിറ്റർ സാനിറ്റൈസർ ഉൽപ്പാദിപ്പിച്ച് വിതരണം ചെയ്തതായി കെ.എസ്.ഡി.പി അധിക‌ൃതർ വ്യക്തമാക്കി. ഹാൻഡ് സാനിറ്റൈസർ നിർമാണം മാർച്ച് 11നാണ് സർക്കാർ കെ.എസ്.ഡി.പിയെ ഏൽപ്പിച്ചത്.12ന് ഉൽപ്പാദനത്തിനുള്ള ശ്രമം തുടങ്ങി. 13ന് 500 മില്ലിയുടെ 2000 ബോട്ടിൽ ഉൽപ്പാദിപ്പിച്ചു. പിറ്റേ ദിവസം 5000 ആയും തുടർന്നുള്ള ദിവസങ്ങളിൽ 15,000 ആയും ഉൽപ്പാദനം വർദ്ധിപ്പിച്ചു. ഇപ്പോൾ ദിവസം 55,000 ബോട്ടിലാണ് ഉൽപ്പാദനം നടത്തുന്നത്. ഭൂരിഭാഗവും മെഡിക്കൽ സെയിൽസ് കോർപറേഷൻ വഴി ആരോഗ്യവകുപ്പിനാണ് കൈമാറിയത്. സർക്കാർ സ്ഥാപനങ്ങൾ, പൊതുമേഖലാ സ്ഥാപനങ്ങൾ, ബാങ്കുകൾ, തദ്ദേശസ്ഥാപനങ്ങൾ, മാദ്ധ്യമങ്ങൾ, ജനകീയ സംഘടനകൾ, പാലിയേറ്റീവ് പ്രസ്ഥാനങ്ങൾ എന്നിവ വഴിയും വിതരണം ചെയ്തിട്ടുണ്ട്.

കമ്പനി ഔട്ട്‌ലെറ്റിലൂടെ പെതുജനങ്ങൾക്ക് നേരിട്ടും വിതരണം ചെയ്തു. 500എം.എല്ലിന് 198 രൂപയാണ് ഈടാക്കുന്നത്. ഔട്ട്‌ലെറ്റിലൂടെ ഉച്ചയ്ക്ക് 2 മണി മുതലാണ് വിതരണം. കൺസ്യൂമർഫെഡ്, സപ്ലൈകോ വഴിയും വിതരണം നടത്തി. പനി, ചുമ, ശ്വാസതടസ്സം, അലർജി തുടങ്ങിയ അസുഖങ്ങൾക്കുള്ള ആവശ്യമരുന്നുകളുടെ നിർമാണവും വർദ്ധിപ്പിച്ചിട്ടുണ്ട്. മാസ്‌ക് നിർമാണത്തിന് സംവിധാനമുണ്ടാക്കിയെങ്കിലും അസംസ്‌കൃത വസ്തുക്കൾ ലഭ്യമല്ലാതത്തിനാൽ താൽക്കാലിക്കമായി നിർത്തിയ നിലയിലാണ്. ഇതിനായി ശ്രമം തുടരുന്നുണ്ട്.