കൊറോണയുടെ പശ്ചാത്തലത്തിൽ രാജ്യത്ത് ലോക്ക് ഡൗൺ പ്രഖ്യാപിച്ചതോടെ എല്ലാവരും സ്വന്തം വീടുകളിൽ തന്നെ കഴിയുകയാണ്. ജനങ്ങളെ പിടിച്ചിരുത്താൻ പഴയകാല സീരിയലുകളും തുടങ്ങി കഴിഞ്ഞു. ഇപ്പോൾ പ്രേക്ഷകരുടെ അഭ്യർത്ഥന പ്രകാരം ശക്തിമാൻ ഏപ്രിൽ മുതൽ പുനഃസംപ്രേഷണം ചെയ്യുമെന്ന് വാർത്താവിനിമയ മന്ത്രാലയം വ്യക്തമാക്കിയിരിക്കുകയാണ്.

ദൂരദർശൻ ചാനലിൽ എല്ലാ ദിവസവും ഉച്ചയ്ക്ക് 1 മുതലാണ് സീരിയൽ സംപ്രേഷണം ചെയ്യുക. ഒരു മണിക്കൂറാണ് ദൈർഘ്യം. ദൂരദർശനിൽ മുൻമ്പ് സംപ്രേഷണം ചെയ്തിരുന്ന രാമായണവും മഹാഭാരതവും പുനഃസംപ്രേഷണം ചെയ്യാനുള്ള ആവശ്യം ഉയരുകയും കേന്ദ്രസർക്കാർ സംപ്രേഷണ അനുമതി നൽകുകയും ചെയ്തു. ഇതിനു പിന്നാലെയാണ് ശക്തിമാനായും മുറവിളി ഉയർന്നത്. ശക്തിമാൻ, ചാണക്യ, ശ്രീമാൻ ശ്രീമതി എന്നിവയടക്കം അഞ്ച് പ്രധാന സീരിയലുകളാണ് എപ്രിൽ മുതൽ പുനഃസംപ്രേഷണം ചെയ്യുക. 'രാമായണം', 'മഹാഭാരതം' എന്നീ സീരിയലുകളുടെ പുനഃസംപ്രേഷണം നേരത്തെ ആരംഭിച്ചിരുന്നു.