മേലാറ്റൂർ (മലപ്പുറം): ഫേസ്ബുക്കിലൂടെ ആരോഗ്യമന്ത്രി കെ.കെ. ശൈലജയ്ക്കെതിരെ അശ്ലീല പരാമർശം നടത്തിയ കേസിൽ യുവാവ് അറസ്റ്റിൽ. മണ്ണാർമല സ്വദേശി കൈപ്പിള്ളി വീട്ടിൽ അൻഷാദാണ് (34) അറസ്റ്റിലായത്. പ്രതിയുടെ ഫേസ്ബുക്ക് അക്കൗണ്ടായ 'അൻഷാദ് മലബാറി' എന്ന പേജിലൂടെ മറ്റൊരു പോസ്റ്റിന് മറുപടി കൊടുക്കുമ്പോഴായിരുന്നു വിവാദ പരാമർശം.

പ്രവാസിയായിരുന്ന അൻഷാദ് നാട്ടിൽ ചെറിയ ബിസിനസ് നടത്തിവരികയാണ്. പ്രതിയുടെ ഫേസ് ബുക്ക് അക്കൗണ്ടുള്ള സ്മാർട്ട് ഫോണും പിടിച്ചെടുത്തു.സൈബർ ഫോറൻസിക് വിഭാഗത്തിന് ഫോൺ കൈമാറും. പ്രകോപനം സൃഷ്ടിച്ച് ലഹളയും ചേരിതിരിവും ഉണ്ടാക്കാൻ ശ്രമിച്ച കുറ്റത്തിനും നവമാദ്ധ്യമങ്ങളിലൂടെ അനാവശ്യ പരാമർശങ്ങൾ നടത്തി ശല്യപ്പെടുത്തിയ കുറ്റത്തിനും കേസെടുത്തതായി പൊലീസ് അറിയിച്ചു. പ്രതിക്ക് ജാമ്യം അനുവദിച്ചു.