മലപ്പുറം: ജില്ലയിൽ 166 പേർക്ക് കോവിഡ് വൈറസ് ബാധയില്ലെന്ന് ആരോഗ്യ വകുപ്പ് സ്ഥിരീകരിച്ചതായി ജില്ലാ കളക്ടർ ജാഫർ മലിക് അറിയിച്ചു. 205 സാമ്പിളുകളാണ് രണ്ടുഘട്ട വിദഗ്ധ പരിശോധനകൾക്കായി അയച്ചത്. ആശങ്കപ്പെടേണ്ട സാഹചര്യങ്ങളില്ലെന്നും മുൻകരുതൽ പ്രവർത്തനങ്ങൾ ഊർജ്ജിതമായി പുരോഗമിക്കുകയാണെന്നും ജില്ലാ കളക്ടർ വ്യക്തമാക്കി. ജില്ലയിലിപ്പോൾ 294 പേരാണ് പ്രത്യേക നിരീക്ഷണത്തിലുള്ളത്. 17പേർ ആശുപത്രികളിലെ ഐസൊലേഷൻ വാർഡുകളിലും 277പേർ വീടുകളിൽ സ്വയം നിരീക്ഷണത്തിലുമാണ്. ഇന്നലെ 47 പേർക്ക് കൂടി നിരീക്ഷണം ഏർപ്പെടുത്തിയതായി ജില്ലാ മെഡിക്കൽ ഓഫീസർ ഡോ. കെ.സക്കീന അറിയിച്ചു. മഞ്ചേരി മെഡിക്കൽ കോളജ് ആശുപത്രിയിലെ ഐസൊലേഷൻ വാർഡിൽ 10പേരും തിരൂർ ജില്ലാ ആശുപത്രിയിൽ മൂന്നുപേരും തിരൂരങ്ങാടി താലൂക്ക് ആശുപത്രിയിൽ നാലുപേരുമാണുള്ളത്. ഇതിൽ എട്ടുപേർ സൗദി അറേബ്യയിൽ നിന്നും അഞ്ചുപേർ യു.എ.ഇയിൽ നിന്നും എത്തിയവരാണ്. യു.കെ, ഖത്തർ എന്നിവിടങ്ങളിൽ നിന്നെത്തിയ ഓരോ യാത്രക്കാരും തിരിച്ചെത്തിയവരുമായി നേരിട്ടു സമ്പർക്കം പുലർത്തിയ രണ്ടുപേരുമാണ് ഐസൊലേഷൻ വാർഡുകളിൽ പ്രവേശിപ്പിക്കപ്പെട്ടവർ.