പത്തനംതിട്ട : മലയാലപ്പുഴ ദേവീക്ഷേത്രത്തിലെ പൊങ്കാലയും ഉത്സവ കൊടിയേറ്റും ഇന്ന്. രാവിലെ 8ന് പൊങ്കാല ചടങ്ങുകൾ ആരംഭിക്കും. ജില്ലാ കളക്ടർ പി.ബി. നൂഹ്, കോവിൽമല രാജാവ് രാജാ രാജമന്നൻ, തിരുവിതാംകൂർ ദേവസ്വം ബോർഡ് മെമ്പർ അഡ്വ. കെ.എസ്. രവി, ചലച്ചിത്രതാരങ്ങളായ മല്ലിക സുകുമാരൻ, സുധീർ കരമന, പഞ്ചായത്ത് പ്രസിഡന്റ് കെ. ജയലാൽ എന്നിവർ ഭദ്രദീപം തെളിച്ച് പൊങ്കാല ഉദ്ഘാടനം ചെയ്യും.
രാവിലെ 9ന് ശ്രീകോവിലിൽ നിന്ന് കൊളുത്തുന്ന ദീപത്തിൽ നിന്ന് തന്ത്രി അടിമുറ്റത്തുമഠം പരമേശ്വര ഭട്ടതിരിപ്പാടിന്റെ മുഖ്യകാർമ്മികത്വത്തിൽ പണ്ടാര അടുപ്പിൽ അഗ്‌നിപകരും. തുടർന്ന് പണ്ടാര അടുപ്പിലെ ദീപം പൊങ്കാല അടുപ്പുകളിലേക്കും പകരും. പതിനൊന്നുനാൾ നീണ്ടുനിൽക്കുന്ന ഉത്സവത്തിന്റെ കൊടിയേറ്റ് രാത്രി 7.45ന് നടക്കും. തുടർന്ന് സാംസ്‌കാരിക സമ്മേളനം ദേവസ്വം ബോർഡ് പ്രസിഡന്റ് അഡ്വ. എൻ. വാസു ഉദ്ഘാടനം ചെയ്യും. ദേവസ്വം ബോർഡ് മെമ്പർ അഡ്വ. എൻ. വിജയകുമാർ മുഖ്യാതിഥിയായിരിക്കും. സേവ, പറയിടീൽ, എല്ലാ ദിവസവും അന്നദാനം. 10ന് വൈകീട്ട് 4ന് പ്രമുഖ ഗജവീരന്മാർ പങ്കെടുക്കുന്ന മലയാലപ്പുഴ പൂരം, വിവിധ ദിവസങ്ങളിൽ കലാപരിപാടികൾ എന്നിവയും നടക്കും. സമാപന ദിവസമായ 15ന് വൈകിട്ട് 3ന് ആനയൂട്ട്. തുടർന്ന് ആറാട്ട് ഘോഷയാത്ര, രാത്രി 10ന് ഗാനമേള, 12ന് നൃത്തനൃത്യങ്ങൾ.