പത്തനംതിട്ട: വനിത ശിശുവികസന (ഐ.സി.ഡി.എസ്) മേഖലയിൽ സംസ്ഥാനത്ത് മികച്ച പ്രവർത്തനം നടത്തിയ ജില്ലാ കളക്ടർക്കുളള അവാർഡ് പത്തനംതിട്ട ജില്ലാ കളക്ടർ പി.ബി നൂഹിന് ലഭിച്ചു. അന്താരാഷ്ട്ര വനിതാ ദിനാചരണത്തിന്റെ ഭാഗമായി ഏഴിന് വൈകിട്ട് നാലിന് തിരുവനന്തപുരം നിശാഗന്ധി ഓഡിറ്റോറിയത്തിൽ നടക്കുന്ന സംസ്ഥാനതല വനിതാ ദിനാചരണ സമ്മേളനത്തിൽ അവാർഡ് നൽകും. മുഖ്യമന്ത്രി പിണറായി വിജയൻ ഉദ്ഘാടനം ചെയ്യും. മന്ത്രി കെ.കെ ഷൈലജ അദ്ധ്യക്ഷത വഹിക്കും.

2018-19ലെ പ്രളയവുമായി ബന്ധപ്പെട്ട് അങ്കണവാടികൾ കേന്ദ്രീകരിച്ച് നടത്തിയ പ്രവർത്തനങ്ങൾ, അങ്കണവാടികളിലൂടെയുളള പോഷകാഹാര ലഭ്യത ഉറപ്പുവരുത്തൽ, ട്രൈബൽ മേഖലയിലെ താത്കാലിക അങ്കണവാടികളുടെ പ്രവർത്തനം ആരംഭിക്കൽ, 60 അങ്കണവാടികൾക്ക് റവന്യു പുറമ്പോക്ക് ഭൂമി ഉൾപ്പെടെ ഭൂമികൈമാറ്റം, സ്ത്രീകളും കുട്ടികളും അടക്കമുളളവർക്കായി നടത്തിയ പ്രവർത്തനങ്ങൾ എന്നിവ വിലയിരുത്തിയാണ് അവാർഡിനായി പരിഗണിച്ചത്.

2012ൽ കേരള കേഡർ, ഐ.എ.എസ് ഉദ്യോഗസ്ഥനായി ജോലിയിൽ പ്രവേശിച്ച പി.ബി.നൂഹ് 2018 ജൂണിൽ പത്തനംതിട്ട ജില്ലാ കളക്ടറായി ചുമതലയേറ്റു. മൂവാറ്റുപുഴ സ്വദേശിയാണ്. പത്തനംതിട്ട അസിസ്റ്റന്റ് കളക്ടർ, ഒറ്റപ്പാലം സബ് കളക്ടർ, സാമൂഹ്യനീതി ഡയറക്ടർ തുടങ്ങിയ പദവികൾ വഹിച്ചിട്ടുണ്ട്. പശ്ചിമ ബംഗാൾ കേഡറിലുള്ള സീനിയർ ഐ.എ.എസ് ഉദ്യോഗസ്ഥനും മുൻ കോഴിക്കോട് കളക്ടറുമായ പി.ബി സലീം സഹോദരനാണ്.