പത്തനംതിട്ട : ഇരവിപേരൂർ ഗ്രാമപഞ്ചായത്തിലെ സാമൂഹ്യക്ഷേമ പ്രവർത്തനങ്ങളുടെ നിർവഹണ ഉദ്യോഗസ്ഥ ടി.ആർ.ലതാകുമാരിക്ക് മികച്ച ഐ.സി.ഡി.എസ് സൂപ്പർവൈസർക്കുള്ള സംസ്ഥാന അവാർഡ് ലഭിച്ചു. സാമൂഹ്യക്ഷേമ സാമൂഹ്യനീതി രംഗത്തുള്ള പതിവ് പദ്ധതികളിൽ നിന്ന് വ്യത്യസ്ഥമായി വൈവിദ്ധ്യമാർന്ന പദ്ധതികളാണ് ഇരവിപേരൂരിൽ ഏറ്റെടുത്തത്. വയോജനങ്ങൾക്കായി നടപ്പാക്കിയ സായംപ്രഭ സംസ്ഥാനത്തെ തന്നെ ആദ്യത്തേതും നൂതനവുമായ ആശയമായിരുന്നു. അങ്കണവാടികൾതോറും വയോജനങ്ങളെ സംഘടിപ്പിച്ച് ക്ലാസുകൾ രൂപീകരിച്ചും അവരുടെ സ്ഥിതിവിവരകണക്കുകൾ ശേഖരിച്ച് പദ്ധതി രൂപീകരിച്ചു. മെഡിക്കൽ ക്യാമ്പ്, വിനോദയാത്ര, കലോത്സവം, വയോജനഗ്രാമസഭ, ശ്രവണ സഹായി പോഷകഹാരം മുതലായ വ്യക്തിഗത ആവശ്യങ്ങളുടെ വിതരണം, കുടുംബാരോഗ്യകേന്ദ്രത്തിലേക്ക് വന്നുപോകുവാനുള്ള ഇലക്ട്രിക്കൽ ഓട്ടോ മുതലായ പ്രവർത്തന ഘടകങ്ങളാണ് സായംപ്രഭയിൽ ഉൾപ്പെട്ടുവന്നത്.
നാല് തലമുറയ്ക്കുള്ള സൗകര്യങ്ങൾ ക്രമീകരിച്ച മോഡൽ അങ്കണവാടിയും അവിടെ ഒരുക്കിയ മിനി തിയറ്റർ, ഏയർകണ്ടീഷൻ ചെയ്ത ക്ലാസ് മുറി അടക്കമുള്ള ആധുനിക സൗകര്യങ്ങൾ ശ്രദ്ധേയമായ പ്രവർത്തനമായിരുന്നു. ഭിന്നശേഷിക്കാർ, അങ്കണവാടി കുട്ടികൾ, വയോജനങ്ങൾ എന്നിവർക്കായി നടത്തിയ വ്യത്യസ്ത കലോത്സവമാണ് മറ്റൊരു പദ്ധതി. ഭിന്നശേഷിക്കാർക്ക് വരുമാനദായകമാകുന്ന പെട്ടികടകൾ സ്ഥാപിക്കൽ, ഭിന്നശേഷി വിദ്യാർത്ഥികൾക്ക് സ്‌കോളർഷിപ്പ്, സ്ത്രീകളുടേയും കുട്ടികളുടേയും പരാതിപരിഹാര സംവിധാനമായ ജാഗ്രതാസമതി എന്നിവയും വാർഷിക പദ്ധതിയുടെ ഭാഗമായി. ഇത്തരത്തിൽ 7196331 രൂപ അടങ്കൽ വരുന്ന പദ്ധതികളാണ് ഐ.സി.ഡി.എസിന്റേതായി 2019 -20 ന് നടപ്പാക്കിയത്.