പത്തനംതിട്ട: ഉൾവനത്തിൽ അലഞ്ഞുതിരിഞ്ഞു നടന്ന അജ്ഞാത യുവാവിനെ വനം വകുപ്പ് ഉദ്യോഗസ്ഥർ കണ്ടെത്തി ഗാന്ധിഭവനിൽ എത്തിച്ചു. കോന്നി വനം ഡിവിഷനിൽ കരിപ്പാൻതോട് ഫോറസ്റ്റ് സ്‌റ്റേഷൻ പരിധിയിൽ നിരത്തുപാറയിലാണ് മാനസിക വൈകല്യത്താൽ അലഞ്ഞു നടന്ന യുവാവിനെ ആദിവാസി വാച്ചർമാരാണ് കണ്ടത്. ഇയാൾക്ക് 35 വയസ് തോന്നിക്കും.വിവരം അറിഞ്ഞ് സെക്ഷൻ ഫോറസ്റ്റ് ഓഫീസർ സി.കെ. ഷാജിയുടെ നേതൃത്വത്തിൽ വനം ഉദ്യോഗസ്ഥർ എത്തിയാണ് ഇയാളെ വനത്തിൽ നിന്ന് ഗാന്ധിഭവനിൽ എത്തിച്ചത്.വന്യജീവികളുടെ ഇടയിൽ നിന്നാണ് ഇയാളെ മോചിപ്പിച്ചതെന്നും ഇയാളെ കണ്ടെത്തിയ സ്ഥലത്തിനടുത്ത് കാട്ടുപോത്തുകൾ ഉണ്ടായിരുന്നതായും ഫോറസ്റ്റ് ഓഫീസർ പറഞ്ഞു. സി.കെ.ഷാജിയോടൊപ്പം ബീറ്റ് ഫോറസ്റ്റ് ഓഫീസർമാരായ അരുൺകുമാർ,അജീഷ് എം.ഷിനോസ് എന്നിവരുടെ സാന്നിദ്ധ്യത്തിലാണ് യുവാവിനെ ഗാന്ധിഭവൻ ഏറ്റെടുത്തത്.