പത്തനംതിട്ട: സ്‌കൂൾ ചായംപൂശി മോടിയാക്കിയ പെരുനാട് ഗവ.എൽ.പി സ്‌കൂളിലെ അദ്ധ്യാപികമാർക്ക് വിദ്യാഭ്യാസ മന്ത്രി പ്രൊഫ.സി.രവീന്ദ്രനാഥിന്റെയും ധനമന്ത്രി ഡോ.തോമസ് ഐസക്കിന്റെയും അഭിനന്ദനം. മാതൃകാപരമായ ദൗത്യം സ്വമേധയാ ഏറ്റെടുത്ത അധ്യാപികമാർക്ക് ഹൃദയംനിറഞ്ഞ ആശംസകളെന്ന് മന്ത്രി സി.രവീന്ദ്രനാഥ് ഫേസ്ബുക്ക് പോസ്റ്റിൽ കുറിച്ചു. ധനമന്ത്രി ഡോ.തോമസ് ഐസക്കും അദ്ധ്യാപികമാരുടെ സൽപ്രവർത്തിയെ അഭിനന്ദിച്ച് ഫേസ്ബുക്കിൽ പോസ്റ്റിട്ടു. സ്‌കൂളിലെ ഹെഡ്മിസ്ട്രസ് കർമല കുസുമം, അദ്ധ്യാപികമാരായ ഗീതാ സാമുവേൽ, രാജിപോൾ ജോർജ്, എൻ.ആർ.സുബി, എ.എസ്.മിനി എന്നിവരാണ് തങ്ങൾ പഠിപ്പിക്കുന്ന സ്‌കൂൾ ഹാൾ സ്വന്തം പണം ഉപയോഗിച്ച് അവർ തന്നെ ചായംപൂശി മോടി പിടിപ്പിച്ചത്.