പത്തനംതിട്ട: സഹകരണ ബാങ്കുകൾ വഴി വീടുകളിൽ എത്തിക്കുന്ന സാമൂഹ്യസുരക്ഷ പെൻഷനുകൾ ജില്ലയിൽ മാർച്ച് 26 മുതൽ വിതരണം ചെയ്തു തുടങ്ങി. 2019 ഒക്ടോബർ, നവംബർ മാസങ്ങളിലെ പെൻഷൻ തുകയാണ് ജില്ലയിലെ 101 സഹകരണ ബാങ്കുകൾ മുഖേന വീടുകളിൽ എത്തിക്കുന്നത്. പെൻഷൻ വിതരണത്തിനുള്ള തുക ബന്ധപ്പെട്ട സഹകരണ ബാങ്കുകൾക്ക് നൽകിയിട്ടുണ്ട്.

ജില്ലയിലെ 43,041 പേർക്കാണ് സഹകരണ ബാങ്കുകൾ വഴി വീടുകളിൽ സാമൂഹ്യ സുരക്ഷ പെൻഷനുകൾ എത്തിക്കുന്നത്. ബാങ്കുകളിലെത്തി നേരിട്ട് കൈപ്പറ്റാൻ പ്രയാസം നേരിടുന്നവർക്കാണ് സഹകരണബാങ്ക് മുഖേന പണം വീടുകളിൽ എത്തിക്കുന്നത്. കമ്മിഷൻ ഏജന്റുമാരാണു സാമൂഹ്യ പെൻഷൻ വീടുകളിൽ എത്തിക്കുന്നത്.
പെൻഷൻ വിതരണം നടത്തുന്ന സഹകരണ സ്ഥാപനങ്ങൾ മുൻകരുതലുകൾ പാലിച്ച് പെൻഷൻ വിതരണം പൂർത്തിയാക്കുമെന്ന് ജോയിന്റ് രജിസ്ട്രാർ എം.ജി പ്രമീള അറിയിച്ചു. പെൻഷൻ വിതരണത്തിന് നിയോഗിക്കപ്പെടുന്നവർക്ക് യാത്രചെയ്യുന്നതിന് ആവശ്യമായ രേഖ നൽകാൻ നിർദേശം നൽകിയിട്ടുണ്ട്. ജില്ലയിൽ 101 സഹകരണ ബാങ്കുകൾ വഴി സാമൂഹ്യപെൻഷനുകൾ വീടുകളിൽ എത്തിക്കുന്നതിന് കർഷക പെൻഷൻ 1,52,32,800 രൂപ, വാർദ്ധക്യകാല പെൻഷൻ 7,79,93,000 രൂപ, ഭിന്നശേഷി പെൻഷൻ 1,23,00700 രൂപ, അവിവാഹിതരായ സ്ത്രീകൾക്കുള്ള സാമൂഹിക പെൻഷൻ 10,18,200 രൂപ, വിധവ പെൻഷൻ 1,97,71,800 രൂപ ഉൾപ്പെടെ മൊത്തം 12,61,16,500 രൂപയാണു ലഭിച്ചിട്ടുള്ളത്.