ശാസ്താംകോട്ട: ശാസ്താംകോട്ട ധർമ്മശാസ്ത ക്ഷേത്രത്തിലെ തിരുവുത്സവം സമാപിച്ചു. വിവിധ കരകളുടേയും കെട്ടുത്സവ സമിതികളുടെയും യുവജന സമിതികളുടെയും വ്യക്തികളുടെയും നേർച്ചയായി നിരവധി കെട്ടുകാഴ്ചകളാണ് അണിനിരന്നത്. കെട്ടുകാളകൾ, എരുത്തിലും കാളയും, വണ്ടിക്കുതിരകൾ, ഫ്ലോട്ടുകൾ, രഥങ്ങൾ, ഗജവീരന്മാർ, ചെണ്ടമേളം, മറ്റ് കലാരൂപങ്ങൾ, വാദ്യഘോഷങ്ങൾ എന്നിവ ഉത്സവത്തിന് പകിട്ടേകി. ക്ഷേത്രത്തിൽ എത്തിയ കെട്ടുകാഴ്ചകൾ ദർശനം നൽകി പന്തിയിൽ അണിനിരന്നു. തുടർന്ന് ആറാട്ട് എഴുന്നള്ളത്ത്, കായൽ വിളക്ക്, ആറാട്ട് തിരിച്ചെഴുന്നള്ളത്ത്, സംഗീതസദസ്, നൃത്തനാടകം എന്നിവയും നടന്നു.