കൊല്ലം: ചവറയിൽ റോഡരികിൽ നിറുത്തിയിട്ടിരുന്ന ടോറസ് ലോറി കത്തി നശിച്ചു. ഇന്ന് പുലർച്ചെയാണ് സംഭവം. ചവറ തേവലക്കര കല്ലയ്യത്ത് വീട്ടിൽ അൻസറിന്റെ ഉടമസ്ഥതയിലുള്ള ലോറിയാണ് കത്തിയത്. ചവറ പൈപ്പ് റോഡിൽ നെറ്റിയാട്ട് മുക്കിന് സമീപം പാർക്ക് ചെയ്തിരുന്നതാണ് ലോറി. ഇന്നലെ വൈകിട്ട് ആറരയോടെയാണ് ഓട്ടം കഴി‌ഞ്ഞെത്തിയ ലോറി ഇവിടെ പാർക്ക് ചെയ്തിട്ട് ജീവനക്കാർ വീടുകളിലേക്ക് പോയത്. സാധാരണ ഇവിടെ പാർക്ക് ചെയ്യാറില്ല. പുലർച്ചെ മൂന്നരയോടെ ലോറിയ്ക്ക് തീപിടിച്ചതായാണ് വിവരം.

ഫയർഫോഴ്സും പൊലീസും നാട്ടുകാരും ചേർന്ന് തീ കെടുത്താൻ ശ്രമിച്ചെങ്കിലും ലോറി പൂർണമായും കത്തി നശിച്ചു. പ്രദേശത്തെ സിസി ടിവി ദൃശ്യങ്ങൾ പരിശോധിച്ചപ്പോൾ ആരും ലോറിയ്ക്കടുത്തേക്ക് പോകുന്നത് കണ്ടെത്താൻ കഴിഞ്ഞിട്ടില്ല. ചവറ പൊലീസ് കേസെടുത്തു. വേറെയും ലോറികളുള്ളയാളാണ് അൻസർ.