 ഒരുസമയം അഞ്ചുപേരിൽ കൂടുതൽ റേഷൻ കടയ്ക്ക് മുന്നിൽ നിൽക്കരുത്

കൊല്ലം: കൊറോണയുടെ പശ്ചാത്തലത്തിൽ സംസ്ഥാന സർക്കാർ പ്രഖ്യാപിച്ച സൗജന്യ റേഷന്റെ വിതരണം ജില്ലയിലെ റേഷൻ കടകൾ വഴി ഇന്ന് ആരംഭിക്കും. എല്ലാ മുന്നൊരുക്കങ്ങളും പൊതുവിതരണ സംവിധാനത്തിൽ പൂർത്തിയായി. ദിവസവും ഉച്ചവരെ മുൻഗണനാ വിഭാഗങ്ങൾക്കും ഉച്ചയ്ക്ക് ശേഷം മുൻഗണനേതര വിഭാഗങ്ങൾക്കുമായാണ് റേഷൻ വിതരണം.

1. അന്ത്യോദയ വിഭാഗങ്ങൾക്ക് (മഞ്ഞ കാർഡ്) നിലവിൽ ലഭിക്കുന്ന 35 കിലോ ഭക്ഷ്യധാന്യം സൗജന്യമായി ലഭിക്കും.

2. പ്രയോരിറ്റി ഹൗസ് ഹോൾഡ്‌സ് (പി.എച്ച്.എച്ച്) വിഭാഗത്തിൽപ്പെട്ട പിങ്ക് കാർഡ് ഉടമകൾക്ക് കാർഡിലുള്ള ഒരു അംഗത്തിന് അഞ്ചുകിലോ വീതം സൗജന്യ ധാന്യം നൽകും.

3.വെള്ള, നീല കാർഡുകളുള്ള മുൻഗണനേതര വിഭാഗങ്ങൾക്ക് കുറഞ്ഞത് 15 കിലോഗ്രാം ഭക്ഷ്യധാന്യം ലഭിക്കും.

4. പതിനഞ്ച് കിലോയിൽ കൂടുതൽ ധാന്യം നിലവിൽ ലഭിക്കുന്ന നീല കാർഡ് ഉടമകൾക്ക് അത് തുടർന്നും ലഭിക്കും.

5. സൗജന്യ റേഷൻ വിതരണം 20 ന് മുമ്പ് പൂർത്തിയാക്കും.

6. ഇതിന് ശേഷമാകും കേന്ദ്ര സർക്കാർ പ്രഖ്യാപിച്ചിട്ടുള്ള സൗജന്യ റേഷൻ വിതരണം

7. കൊറോണയുടെ സുരക്ഷാ മുൻകരുതലുകൾ പാലിക്കേണ്ടതിനാൽ റേഷൻ കടകളിൽ ഉപഭോക്താക്കൾ തടിച്ചുകൂടരുത്

8. ഒരേ സമയം അഞ്ചുപേരിൽ കൂടുതൽ റേഷൻ കടയ്ക്ക് മുന്നിൽ നിൽക്കാൻ പാടില്ല.

9. ഇക്കാര്യം ഉറപ്പ് വരുത്താൻ കടയുടമയ്ക്ക് ടോക്കൺ വ്യവസ്ഥ നിശ്ചയിക്കാവുന്നതാണ്.

10. ജനപ്രതിനിധികൾ, പഞ്ചായത്ത്, മുനിസിപ്പൽ ഓഫീസുകളിൽ രജിസ്റ്റർ ചെയ്ത സന്നദ്ധ പ്രവർത്തകർ എന്നിവരുടെ സഹായവും തേടാം.

11.റേഷൻ കടയിൽ നേരിട്ടെത്താൻ കഴിയാത്തവർക്ക് ധാന്യങ്ങൾ വീട്ടിലെത്തിച്ച് കൊടുക്കാൻ കടയുടമ ക്രമീകരണമുണ്ടാക്കും. ഇതിന് സന്നദ്ധ പ്രവർത്തകരുടെ സേവനം തേടാം.

12. റേഷൻ കാർഡ് ഇല്ലാത്ത കുടുംബങ്ങൾക്കും സൗജന്യമായി ഭക്ഷ്യധാന്യം നൽകും. ഇതിനായി ആധാർ കാർഡും ഫോൺ നമ്പറും ചേർത്തുള്ള സത്യവാങ്മൂലം റേഷൻ വ്യാപാരിക്ക് നൽകണം.

13. തെറ്റായ സത്യവാങ്മൂലം നൽകി റേഷൻ കൈപ്പറ്റുന്നവരിൽ നിന്ന് ധാന്യത്തിന്റെ മാർക്കറ്റ് വിലയുടെ ഒന്നര ഇരട്ടി തുക പിഴയായി ഈടാക്കും.

''

സൗജന്യ റേഷൻ വിതരണത്തിനുള്ള മുന്നൊരുക്കങ്ങൾ പൂർത്തിയായി. ഇന്ന് മുതൽ റേഷൻ വിതരണം ആരംഭിക്കും.

സി.എസ്.ഉണ്ണിക്കൃഷ്ണകുമാർ

ജില്ലാ സപ്ലൈ ഓഫീസർ