കൊല്ലം: കൊല്ലം റൂറൽ ജില്ലയിൽ ഡ്രോൺ ഉപയോഗിച്ചുള്ള നിരീക്ഷണത്തിന് തുടക്കമായി. എല്ലാ പൊലീസ് സ്റ്റേഷൻ പരിധിയിലും അതാത് സ്റ്റേഷൻ ഹൗസ് ഓഫീസറുടെ മേൽനോട്ടത്തിലാണ് ഡ്രോൺ ഉപയോഗിച്ചുള്ള നിരീക്ഷണം. നിരീക്ഷണത്തിന്റെ അടിസ്ഥാനത്തിൽ വിലക്ക് ലംഘിക്കുന്നവർക്കെതിരെ കർശന നടപടി സ്വീകരിക്കുമെന്ന് റൂറൽ എസ്.പി ഹരിശങ്കർ അറിയിച്ചു. കൊട്ടാരക്കര ടൗണിൽ നിരീക്ഷണം നടത്തിക്കൊണ്ടാണ് ഡ്രോൺ റൂറൽ ജില്ലയിലെത്തിയത്. സി.ഐ വി.എസ്.പ്രശാന്ത്, എസ്.ഐ സാബുജിമാസ് എന്നിവർ നേതൃത്വം നൽകി. രാവും പകലും പ്രധാന കവലകളിലെല്ലാം പൊലീസ് സാന്നിദ്ധ്യമുണ്ട്. കടന്നുപോകുന്ന വാഹനങ്ങളെ തട‌ഞ്ഞ് നിർത്തി പരിശോധിച്ചുവരികയാണ്. അനാവശ്യമായി പുറത്തിറങ്ങുന്നവരെ അറസ്റ്റ് ചെയ്യുകയും പിഴ ചുമത്തുകയും ചെയ്തുവരുന്നതായും എസ്.പി അറിയിച്ചു. നിരീക്ഷണം ശക്തമാക്കുന്നതിന്റെ ഭാഗമായിട്ടാണ് എല്ലാ സ്റ്റേഷനുകളിലും ഡ്രോൺ നിരീക്ഷണ സംവിധാനം ഏർപ്പെടുത്തിയത്.