തൃശൂർ: പരീക്ഷകാലം തുടങ്ങി. വിദ്യാർത്ഥികൾക്കൊപ്പം രക്ഷിതാക്കളും സമ്മർദ്ദത്തിലാകുന്ന സമയം. മികച്ച മാർക്ക് നേടാനുള്ള ശ്രമത്തിലാകും വിദ്യാർത്ഥികൾ. മക്കൾക്ക് ആവശ്യത്തിന് മാർക്ക് കിട്ടുമോയെന്ന ആശങ്കയിലാകും മാതാപിതാക്കൾ സമ്മർദ്ദത്തിന് അടിമപ്പെടുന്നത്. പരീക്ഷാഭയമോ ആകാംക്ഷയോ മൂലം വിവിധ മാനസിക പ്രശ്‌നങ്ങൾ അനുഭവിക്കുന്ന കുട്ടികളെ ടെൻഷൻ ഫ്രീയാക്കാൻ ജില്ലാ ഭരണകൂടമാണ് ഒരുങ്ങുന്നത്.

കുട്ടികൾക്ക് ഏതെങ്കിലും തരത്തിൽ മാനസിക ബുദ്ധിമുട്ട് തോന്നുന്ന പക്ഷം കൗൺസലിംഗ്, ഡോക്ടർമാരുടെ സേവനം എന്നിവ നൽകും. ആരോഗ്യവകുപ്പ്, ജില്ലാ ശിശുസംരക്ഷണ യൂണിറ്റ്, ഔവ്വർ റെസ്‌പോൺസിബിലിറ്റി ടു ചിൽഡ്രൻ (ഒ.ആർ.സി) പദ്ധതി, സെന്റ് തോമസ് കോളേജ് സോഷ്യൽ വർക്ക് വിഭാഗം എന്നിവരുടെ സംയുക്ത സഹകരത്തോടെയാണ് കളക്ടർ എസ്. ഷാനവാസിന്റെ നേതൃത്വത്തിൽ കുട്ടികൾക്കായി സേവനം ഒരുക്കിയത്.

രക്ഷിതാക്കൾക്കൊപ്പം വിദ്യാർത്ഥികൾ കൂടി നടത്തേണ്ട മുന്നൊരുക്കങ്ങളെക്കുറിച്ച് ഭരണകൂടം നിർദ്ദേശം നൽകുന്നുണ്ട്. ടെലിവിഷൻ, ഇന്റർനെറ്റ് ഉപയോഗം നിയന്ത്രിക്കുക തുടങ്ങി വിവിധ നിർദ്ദേശങ്ങളും നൽകുന്നുണ്ട്.

ഭക്ഷണക്രമീകരണം
ദഹനവ്യൂഹത്തിനും മറ്റും അമിതാധ്വാനം നൽകുന്ന ഭക്ഷണങ്ങൾ ഒഴിവാക്കണം. പച്ചക്കറികൾ അധികം ഭക്ഷണത്തിൽ ഉൾപ്പെടുത്തുകയും ധാരാളം വെള്ളം കുടിക്കുകയും വേണം.

മാനസിക സമർദ്ദം ഉണ്ടെങ്കിൽ ഈ നമ്പറുകളിൽ വിളിക്കാം

ഡോ. സുബ്രഹ്മണ്യൻ - 9447145622(വൈകീട്ട് 6 മുതൽ രാത്രി 10 വരെ), ഡോ. ഗിരീഷ് മേനോൻ - 8281906826 (വൈകീട്ട് 4 മുതൽ രാത്രി 9 വരെ), ഡോ. സ്മിത രാംദാസ്- 9495421321 (വൈകീട്ട് 56 മുതൽ രാത്രി 8 വരെ), ഡോ. കെ.വി. പാർവതി- 9447030625 (രാവിലെ 8 മുതൽ 12 വരെ, വൈകീട്ട് 4 മുതൽ 8 വരെ), ഡോ. ബാസ്പിൻ- 9447295310 (രാവിലെ 10 മുതൽ രാത്രി 10 വരെ), രേഷ്മ(സൈക്കോളജിസ്റ്റ് ഒ.ആർ.സി- 9048952199 (രാവിലെ 10 മുതൽ വൈകീട്ട് 7 വരെ), ജില്ലാ ശിശു സംരക്ഷണ യൂണിറ്റ് കൗൺസിലർ ശ്രുതി- 9744151523 (രാവിലെ 10 മുതൽ വൈകീട്ട് 7 വരെ), സോഷ്യൽ വർക്ക് ഡിപ്പാർട്‌മെന്റ് അസി. പ്രൊഫസർമാരായ ഫാ. അലൻ ടോണി- 9447839724 (രാവിലെ 8 മുതൽ രാത്രി 8 വരെ), സീമ സണ്ണി- 9495331765 (രാവിലെ 8 മുതൽ വൈകീട്ട് 8 വരെ), വില്ലി വർഗീസ്- 9947280253 (രാവിലെ 8 മുതൽ വൈകീട്ട് 8 വരെ), ജിജോ കുരുവിള- 7559918347 (രാവിലെ 8 മുതൽ വൈകീട്ട് 8 വരെ), ഗൗരു ഘോഷ് - 9744008560.

മാതാപിതാക്കൾ ശ്രദ്ധിക്കേണ്ടത്

*കുട്ടികളുടെ ഭക്ഷണരീതി, കുടിവെള്ളം, വിശ്രമം എന്നിവയിൽ രക്ഷിതാക്കൾ ശ്രദ്ധിക്കണം. ഹാൾടിക്കറ്റ് പെൻബോക്‌സ് എന്നിവ ഒരുക്കി നൽകുന്നതിൽ പ്രത്യേക ശ്രദ്ധ ചെലുത്തണം.
*മാതാപിതാക്കളുടെ അമിത ടെൻഷൻ കുട്ടികൾക്ക് കൊടുക്കരുത്. മറ്റു കുട്ടികളുമായി അവരെ താരതമ്യം ചെയ്ത് സംസാരിക്കരുത്. പകരം അവർക്ക് മോട്ടിവേഷൻ നൽകുന്ന സംഭാഷണം നടത്തുക.
*കുട്ടികൾ നേരത്തെ എഴുന്നേറ്റ് പഠിക്കുമ്പോൾ കൂടെയിരിക്കുക. പരീക്ഷയിൽ കൂടുതൽ മാർക്ക് വാങ്ങിയില്ലെങ്കിൽ കുട്ടികൾ മോശമാകുമെന്ന് അവർക്ക് താക്കീത് നൽകരുത്.
*ഓരോ ഉദ്യമവും പൂർത്തിയാക്കുമ്പോൾ അവരെ അഭിനന്ദിക്കുക. ഇടവേളകളിൽ, പഠിച്ച ഭാഗങ്ങൾ രസകരമായി ഓർത്തെടുക്കാൻ അവരോട് ആവശ്യപ്പെടുക.