തൃശൂർ : കോവിഡ് 19 പ്രതിരോധ പ്രവർത്തനങ്ങളെക്കുറിച്ച് ചർച്ച ചെയ്യുന്നതിനായി ജില്ലാ പഞ്ചായത്ത് പ്രസിഡന്റ് മേരി തോമസിന്റെ അദ്ധ്യക്ഷതയിൽ അടിയന്തര യോഗം ചേർന്നു. കോവിഡ് പ്രതിരോധ പ്രവർത്തനങ്ങൾക്ക് സംസ്ഥാന സർക്കാരും ജില്ലാ പഞ്ചായത്ത് ഭരണകൂടവും നൽകിയിട്ടുള്ള എല്ലാ നിർദ്ദേശങ്ങളും കർശനമായി പാലിക്കുന്നതിന് യോഗം തീരുമാനമെടുത്തു. കോവിഡ് 19 പ്രതിരോധ പ്രവർത്തനങ്ങൾക്കായി ജില്ലാ പഞ്ചായത്തിന്റെ ഉടമസ്ഥതയിലുള്ള വടക്കാഞ്ചേരി ജില്ലാ ആശുപത്രിക്ക് രണ്ടു ലക്ഷം രൂപ അനുവദിച്ചു.

പൊതുജനങ്ങൾ സേവനങ്ങൾക്കായി ഓഫീസിൽ നേരിട്ട് ഹാജരാകുന്നത് ഒഴിവാക്കുന്നതിനായി സേവനങ്ങൾ ഓൺലൈനായി ലഭ്യമാക്കുന്ന ഈ ഓഫീസ് സംവിധാനം പരമാവധി ഉപയോഗിക്കണമെന്ന് പ്രസിഡന്റ് അഭ്യർത്ഥിച്ചു. ജില്ലാ പഞ്ചായത്ത് ഓഫീസിൽ വിവിധ ആവശ്യങ്ങൾക്കായി വരുന്ന പൊതുജനങ്ങൾക്ക് കൈകഴുകുന്നതിനുള്ള സൗകര്യവും ഒരുക്കിയിട്ടുണ്ട്. വൈസ് പ്രസിഡന്റ് എൻ.കെ ഉദയ പ്രകാശൻ, സ്ഥിരം സമിതി അദ്ധ്യക്ഷന്മാരായ ജെന്നി ജോസഫ്, കെ.ജെ ഡിക്‌സൺ, ദീപ എസ്. നായർ, മഞ്ജുള അരുണൻ, മുൻ പ്രസിഡന്റ് ഷീല വിജയകുമാർ, മുൻ വൈസ് പ്രസിഡന്റ് കെ.പി രാധാകൃഷ്ണൻ, സെക്രട്ടറി കെ.ജി തിലകൻ എന്നിവർ പങ്കെടുത്തു.