ചാവക്കാട്: പുന്നയൂർ പഞ്ചായത്തിൽ കോവിഡ് 19 റിപ്പോർട്ട് ചെയ്ത സാഹചര്യത്തിൽ അടിയന്തര യോഗം ചേർന്നു. പഞ്ചായത്തിൽ അടിയന്തരമായി കൈകൊള്ളേണ്ട കാര്യങ്ങളെ കുറിച്ച് ചർച്ച ചെയ്യുന്നതിന് വേണ്ടിയാണ് യോഗം ചേർന്നത്. കെ.വി. അബ്ദുൽ ഖാദർ എം.എൽ.എ അദ്ധ്യക്ഷനായി. പഞ്ചായത്ത് പ്രസിഡന്റ് ബുഷറ ഷംസുദ്ദീൻ, വൈസ് പ്രസിഡന്റ് ഐ.പി. രാജേന്ദ്രൻ, ആരോഗ്യ വിദ്യാഭ്യാസ സ്ഥിരം സമിതി അദ്ധ്യക്ഷ എം.കെ. ഷഹർബാൻ, ക്ഷേമ കാര്യ സ്ഥിരം സമിതി അദ്ധ്യക്ഷൻ പി.വി. ശിവാനന്ദൻ, പഞ്ചായത്ത് അംഗങ്ങളായ ആർ.പി. ബഷീർ, കെ.വി. അബ്ദുൽ കരീം, സെക്രട്ടറി സുഭാഷ്, ഹെൽത്ത് ഇൻസ്‌പെക്ടർ ഇൻ ചാർജ് സുരേഷ് തുടങ്ങിയവർ പങ്കെടുത്തു. പഞ്ചായത്തിൽ മുഴുവൻ പ്രദേശങ്ങളിലും പ്രത്യേകിച്ച് കോവിഡ് സ്ഥിരീകരിച്ച പ്രദേശത്തും ജാഗ്രത പുലർത്താനും അണുനശീകരണം നടത്താനും യോഗം തീരുമാനിച്ചു. കൂടാതെ കുടുംബാരോഗ്യ കേന്ദ്രത്തിൽ ഹെൽപ്പ് ഡെസ്‌ക് ആരംഭിക്കാനും തീരുമാനിച്ചു.