ചേലക്കര: ചേലക്കര പഞ്ചായത്തിൽ കോവിഡ് 19 പ്രതിരോധ പ്രവർത്തനങ്ങൾ സംബന്ധിച്ച അവലോകന യോഗം യു.ആർ. പ്രദീപ് എം.എൽ.എയുടെ നേതൃത്വത്തിൽ നടന്നു. നിലവിൽ നടന്ന പ്രവർത്തനങ്ങൾ വിലയിരുത്തി. തുടർ പ്രവർത്തനങ്ങൾ ആസൂത്രണം ചെയ്തു. 310 പേരാണ് നിലവിൽ വീടുകളിൽ നിരീക്ഷണത്തിലുള്ളത്. ആശുപത്രികളിൽ ആരും നിരീക്ഷണത്തിലില്ല.

നിരീക്ഷണത്തിലുള്ള സാമ്പത്തിക പ്രയാസമുള്ള കുടുംബങ്ങൾക്ക് പഞ്ചായത്ത് സഹായം എത്തിക്കുന്നുണ്ട്. ഒറ്റയ്ക്ക് കഴിയുന്നവർ, പാചകം ചെയ്യാൻ കഴിയാത്തവർ, ലോക്ക് ഡൗൺ മൂലം ഭക്ഷണം ലഭിക്കാൻ ബുദ്ധിമുട്ടുള്ളവർ, ഹോം ക്വാറന്റൈൻ മൂലം ഭക്ഷണ ക്ഷാമം അനുഭവിക്കുന്നവർ എന്നിവർക്കായി കുടുംബശ്രീയുടെ നേതൃത്വത്തിൽ കമ്മ്യൂണിറ്റി കിച്ചൺ പ്രവർത്തനം തുടങ്ങി.

ചേലക്കര പോളിടെക്‌നിക്ക് കാന്റീനിലാണ് കമ്മ്യൂണിറ്റി കിച്ചൺ പ്രവർത്തിക്കുന്നത്. ഭക്ഷണം വേണ്ടവർ മുൻകൂട്ടി അറിയിക്കണം. അലഞ്ഞ് നടക്കുന്നവരെ സംരക്ഷിക്കുന്നതിനായി ചേലക്കര ഗവ. എൽ.പി സ്‌കൂളിൽ ഷെൽട്ടർ ഒരുക്കിയിട്ടുണ്ട്. പഞ്ചായത്തും, ബന്ധപ്പെട്ട എല്ലാവകുപ്പുകളും, സന്നദ്ധ പ്രവർത്തകർ ഉൾപ്പെടെയുള്ള എല്ലാവരുടെയും കൂട്ടായ രോഗ പ്രതിരോധ
പ്രവർത്തനങ്ങൾ പഞ്ചായത്തിൽ നടന്നുവരുന്നു.

ഗ്രാമ പഞ്ചായത്ത് പ്രസിഡന്റ്, ഗ്രാമപഞ്ചായത്ത് സ്റ്റിയറിംഗ് കമ്മിറ്റി അംഗങ്ങൾ, വിവിധ ഡിപ്പാർട്ട്‌മെന്റ് തലവൻമാർ എന്നിവർ പങ്കെടുത്തു.