കുഴിത്തുറ: കന്യാകുമാരി സ്വാമിതോപ്പ് അയ്യാ വൈകുണ്ഠസ്വാമി ക്ഷേത്രത്തിൽ കുംഭമാസ ഉത്സവവും സ്വാമിയുടെ ജന്മദിനവും ഇന്നലെ ആഘോഷിച്ചു. തിങ്കളാഴ്ച രാവിലെ 6ന് തിരിച്ചെന്തൂരിൽ നിന്ന് ആരംഭിച്ച വാഹന ഘോഷയാത്ര ഉടൻക്കുടി, ആരുവാമൊഴി വഴി നാഗർകോവിൽ നാഗരാജ ക്ഷേത്ര മൈതാനത്തിൽ എത്തിച്ചേർന്നു. രാവിലെ 9ന് തിരുവനന്തപുരം പത്മനാഭസ്വാമി ക്ഷേത്രത്തിൽ നിന്നാരംഭിച്ച ഘോഷയാത്ര മാർത്താണ്ഡം വഴി രാത്രിയോടെ നാഗരാജ ക്ഷേത്രമൈതാനത്തിലെത്തി. ഇന്നലെ രാവിലെ 5ന് നാഗരാജ ക്ഷേത്രത്തിൽ നിന്നും പുറപ്പെട്ട ഘോഷയാത്ര കോട്ടാർ, ശുചീന്ദ്രം, ഈത്തൻക്കാട് വഴി ഉച്ചക്ക് സ്വാമി തോപ്പിലെത്തിചേർന്നു. ബാല പ്രചാതിപതി അടികൾ നേതൃത്വം വഹിച്ച ഘോഷയാത്രയിൽ ആയിരങ്ങൾ പങ്കെടുത്തു. മാർത്താണ്ഡത്ത് നിന്ന് സ്വാമിതോപ്പിലേക്ക് സ്പെഷ്യൽ ബസുകൾ സർവീസ് നടത്തി. ജില്ലാ പൊലീസ് സൂപ്രണ്ട് ശ്രീനാഥിന്റെ നേതൃത്വത്തിൽ കനത്ത പൊലീസ് സുരക്ഷയും ഒരുക്കിയിരുന്നു.