ആറ്റിങ്ങൽ: കൊറോണ പ്രതിരോധ പ്രവർത്തനത്തിന്റെ ഭാഗമായി ആറ്റിങ്ങൽ നഗരസഭ ശക്തമായ നടപടികൾ സ്വീകരിച്ചു. കൊല്ലമ്പുഴയിലെ കുട്ടികളുടെ പാർക്കും മുനിസിപ്പൽ ലൈബ്രറിയും വായനശാലയും ഇനിയൊരറിയിപ്പ് ഉണ്ടാകുന്നതുവരെ അടച്ചിടാൻ തീരുമാനിച്ചു. എല്ലാ ഹോട്ടലുകളും റസ്റ്റോറന്റുകളും ഉച്ചയ്ക്ക് 3 മണിക്ക് അടച്ചിട്ട് അണുനശീകരണം നടത്താൻ നിർദ്ദേശം നൽകി. എല്ലാ പാരലൽ വിദ്യാഭ്യാസ സ്ഥാപനങ്ങളും ഇന്ന് മുതൽ അടച്ചിടണമെന്നും നിർദ്ദേശം ലംഘിക്കുന്നവരുടെ ലൈസൻസ് റദ്ദാക്കുമെന്നും അറിയിപ്പിൽ പറയുന്നു. മുനിസിപ്പൽ ഹാളിന്റെയും മുനിസിപ്പൽ ലൈബ്രറി ഹാളിന്റെയും ബുക്കിംഗ് ഇനിയൊരറിയിപ്പ് ഉണ്ടാകുന്നതുവരെ നിറുത്തിവച്ചു. ഹോട്ടലുകളിലും റസ്റ്റോറന്റുകളിലും വിവാഹ മണ്ഡപങ്ങളിലും ഹാൻഡ് വാഷിംഗ് സിസ്റ്റം ശക്തമാക്കാൻ തീരുമാനിച്ചു. നഗരസഭയിലെ പഞ്ചിംഗ് സംവിധാനം നിറുത്തിവച്ചു. നഗരസഭാ ഹെൽത്ത് വിഭാഗത്തിലെ ജീവനക്കാർക്ക് അടിയന്തര ആവശ്യങ്ങൾക്ക് മാത്രമേ അവധി അനുവദിക്കുകയുള്ളു. ആശാവർക്കർമാർ,​ അങ്കണവാടി ജീവനക്കാർ, ​ഹെൽത്ത് വിഭാഗം ഉദ്യോഗസ്ഥർ,​ ജീവനക്കാർ എന്നിവരുടെ അടിയന്തര യോഗം ഇന്ന് ഉച്ചയ്ക്ക് 3ന് നഗരസഭാ ഓഫീസിൽ ചേരുമെന്നും നഗരസഭയുടെയും സർക്കാരിന്റെയും പ്രവർത്തനങ്ങളോട് എല്ലാവരും പൂർണമായും സഹകരിക്കണമെന്നും ചെയർമാൻ എം.പ്രദീപ് അറിയിച്ചു.