വെഞ്ഞാറമൂട് : ബാലൻസ് നൽകിയതിനെച്ചൊല്ലിയുണ്ടായ തർക്കത്തിനുപിന്നാലെ യുവാവിന്റെ നേതൃത്വത്തിൽ പെട്രോൾ പമ്പിൽ അക്രമം നടത്തി. മാനേജരും ഹിന്ദു ഐക്യവേദി ജില്ലാ രക്ഷാധികാരിയുമായ കോലിയക്കാട് മോഹനൻ (59), പമ്പ് ജീവനക്കാരൻ മഹേശ്വരൻ നായർ (58) എന്നിവർക്കാണ് പരിക്കേറ്റത്. കഴിഞ്ഞ ദിവസം രാത്രി 8.30ന് വെഞ്ഞാറമൂട് ആറ്റിങ്ങൽ റോഡിലെ ഐ.ഒ.സി പമ്പിലായിരുന്നു സംഭവം. ബാലൻസ് നൽകിയതുമായി ബന്ധപ്പെട്ട് പെട്രോൾ അടിക്കാനെത്തിയ യുവാവും പമ്പ് ജീവനക്കാരുമായി തർക്കമുണ്ടായി. തുടർന്ന് സ്ഥലത്തുനിന്ന് പോയ യുവാവ് സംഘമായെത്തി പെട്രോൾ പമ്പിൽ ആക്രമണം നടത്തുകയായിരുന്നെന്ന് പമ്പ് അധികൃതർ പൊലീസിന് നൽകിയ പരാതിയിൽ പറയുന്നു. അക്രമത്തിനിടെ പമ്പിൽ സൂക്ഷിച്ചിരുന്ന 21,000 രൂപ നഷ്ടപ്പെട്ടതായും പരാതിയുണ്ട്. പരിക്കേറ്റവരെ വെഞ്ഞാറമൂട് ശ്രീ ഗോകുലം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. വെഞ്ഞാറമൂട് പൊലീസ് കേസെടു ത്തു.