തിരുവനന്തപുരം: കൊറോണ (കൊവിഡ് 19) രോഗ വ്യാപനത്തിന്റെ പശ്ചാത്തലത്തിൽ കേൾവി പരിമിതർക്കായി ആംഗ്യ ഭാഷയിലുള്ള നാല് വീഡിയോ സംസ്ഥാന സർക്കാർ പുറത്തിറക്കി.കൊറോണ സംബന്ധിച്ച വിവരങ്ങൾ കൃത്യമായി ലഭ്യമാക്കാൻ ആംഗ്യഭാഷ പരിഭാഷകൻ വിനയചന്ദ്രന്റെ സഹായത്തോടെ പി.ആർ.ഡിയാണ് വീഡിയോകൾ തയ്യാറാക്കിയത്.

കൊറോണയെക്കുറിച്ചുള്ള പൊതുവിവരങ്ങൾ, സ്വീകരിക്കേണ്ട മുൻകരുതലുകൾ വിദേശത്ത് നിന്നെത്തുന്നവർ പാലിക്കേണ്ട മാർഗനിർദ്ദേശങ്ങൾ, മാസ്‌ക് ഉപയോഗിക്കേണ്ടതെങ്ങനെ, രോഗം ബാധിച്ചതായി സംശയമുണ്ടായാൽ സ്വീകരിക്കേണ്ട മാർഗങ്ങൾ, രോഗലക്ഷണങ്ങൾ, ചികിത്സ വ്യാജപ്രചരണങ്ങൾക്കെതിരായ മുന്നറിയിപ്പ് എന്നിവയാണ് പ്രധാനമായും വീഡിയോകളിൽ ഉൾപ്പെടുത്തിയിട്ടുള്ളത്. ശബ്ദവിവരണം,സ്‌ക്രോൾ, കോൾ സെന്റർ, കൺട്രോൾ റൂം നമ്പരുകൾ എന്നിവയുമുണ്ട്.

മുഖ്യമന്ത്രിയുടെ ഫേസ്ബുക്ക് പേജ്, പി.ആർ.ഡി വെബ്‌സൈറ്റ്, കേരള ഗവൺമെന്റ് ഫേസ്ബുക്ക് പേജ്, സർക്കാർ ന്യൂസ് പോർട്ടൽ, യുട്യൂബ് ചാനൽ, ജില്ലാ ഇൻഫർമേഷൻ ഓഫീസുകളുടെ ഫേസ്ബുക്ക് പേജുകൾ എന്നിവയിലൂടെ വീഡിയോ പരമാവധി പേരിലെത്തിക്കും. ആൾ കേരള അസോസിയേഷൻ ഒഫ് ഡെഫ് അടക്കമുള്ള സംഘടനകളും സമൂഹ മാദ്ധ്യമങ്ങളിലൂടെ വീഡിയോ ഷെയർ ചെയ്യുന്നുണ്ട്.