കേരളക്കരയെ ആകെ വിറപ്പിച്ച് കുട്ടനാട്ടിൽ നിന്ന് തുടങ്ങിയ പക്ഷിപ്പനി അടങ്ങിയിരിക്കുകയാണ്. കഴിഞ്ഞമാസം ഭുവനേശ്വറിലാണ് രോഗം പ്രത്യക്ഷപ്പെട്ടത്. 1997 മുതൽ ഹോങ്കോംഗിൽ കണ്ടെത്തിയ രോഗം 2013 ​​​​ൽ വ്യാപകമായി റിപ്പോർട്ട് ചെയ്തു. എച്ച് 5 എൻ 1 രോഗം ഇതുവരെ 650 ഓളം പേരെ ബാധിച്ചതായും 400 ലേറെ പേർ മരിച്ചതായും കണക്കാക്കപ്പെടുന്നു. എച്ച് 5 എൻ1 ഇനത്തിൽപ്പെട്ട വിഭാഗം താരതമ്യേന കുറഞ്ഞ​ തീവ്രതയുള്ളതാണ്.

എങ്ങനെ പകരുന്നു ?

ഈ വൈറസുകൾ സാധാരണയായി കാട്ടുപക്ഷികളിലും അപൂർവേ കാട്ടുമൃഗങ്ങളിലുമാണ് കണ്ടുവരുന്നത്.ദേശാടന പക്ഷികൾ വഴി ഇത് നാട്ടു പക്ഷിക്കൂട്ടങ്ങളായ താറാവ്,​ കോഴി,​ കാട എന്നിവയെ ബാധിക്കുമ്പോൾ വളരെപ്പെട്ടെന്ന് അവയ്ക്കിടയിൽ പടർന്നുപിടിക്കുകയും 48 മണിക്കൂറിനുള്ളിൽ അവയുടെ കൂട്ട മരണത്തിന് കാരണമാവുകയും ചെയ്യും. മനുഷ്യരിലാണ് ഈ രോഗബാധയുണ്ടാകാൻ സാദ്ധ്യതയുള്ളത്.

മനുഷ്യരിൽ നിന്ന് മനുഷ്യരിലേക്ക് പകർന്നതിനുള്ള തെളിവ് ഇതുവരെ ലഭിച്ചിട്ടില്ല. സാധാരണ ഇൻഫ്ളുവൻസ വൈറസിനുള്ള ജനിതക മാറ്റം വഴിയാണ് ഇപ്പോഴത്തെ താരങ്ങളായ എച്ച് 5 എൻ 1,​ എച്ച് 7 എൻ 9 ഉം എച്ച് 1 എൻ 1 ഉം ഉണ്ടായത്.

രോഗലക്ഷണങ്ങൾ

തുടക്കത്തിൽ സാധാരണ ഫ്ളൂപോലുള്ള ലക്ഷണങ്ങളാണ്. കടുത്ത പനി (38 ഡിഗ്രി സെൽഷ്യസിൽ കൂടുതൽ)​,​ ശരീര വേദന,​ ജലദോഷം,​ തൊണ്ട വേദന,​ ചുമ,​ ശ്വാസ തടസ്സം എന്നിവ ഉണ്ടാകും. ഛർദ്ദിൽ,​ വയറിളക്കം,​ വയർ വേദന,​ മൂക്കിൽ നിന്നും തൊണ്ടയിൽ നിന്നും രക്തം വരുക തുടങ്ങിയ ലക്ഷണങ്ങളും ചിലരിൽ ആദ്യമേ കാണും. തുടർന്ന് 4​- 5 ദിവസത്തിനുള്ളിൽ ന്യുമോണിയയുടെ ലക്ഷണങ്ങളായ വിറയലോടുകൂടിയ പനി,​ ശ്വാസം മുട്ടൽ,​ നെഞ്ചുവേദന,​ രക്തത്തിൽ ഓക്സിജന്റെ അളവ് കുറയുക,​ ബോധം നശിക്കുക തുടങ്ങിയ ലക്ഷണങ്ങൾ ഉണ്ടാകും. മറ്റ് അവയവ വ്യൂഹത്തെ ബാധിക്കുമ്പോഴുണ്ടാവുന്ന പ്രവർത്തന സ്തംഭനത്തിന്റെ ലക്ഷണങ്ങളായ ശരീരം നീരുവന്ന് തടിക്കൽ,​ മൂത്രം അളവ് കുറയൽ,​ ബോധക്ഷയം എന്നിവയോ,​ ഹൃദയ പ്രവർത്തന മന്ദതയോ ഉണ്ടാകും. നാഡീവ്യൂഹത്തെ ബാധിക്കുന്ന ലക്ഷണങ്ങളും ഉണ്ടാകാം തുടർന്ന് മരണവും സംഭവിക്കും.

ഡോ. കെ. വേണുഗോപാൽ,​

സീനിയർ കൺസൾട്ടന്റ്,

ശ്രീമംഗലം, പഴവീട്,

ആലപ്പുഴ.

ഫോൺ: 9447162224.