ആറ്റിങ്ങൽ: മുദാക്കൽ ഗ്രാമ പഞ്ചായത്തിന്റെ 2020-21 വർഷത്തെ ബഡ്ജ​റ്റ് അവതരിപ്പിച്ചു. 29,​25,​03,​151 രൂപ വരവും 28,​46,​33,​780 രൂപ ചെലവും 78,​69,​371 രൂപ നീക്കിയിരിപ്പും പ്രതീക്ഷിക്കുന്ന ബജ​റ്റ് ഗ്രാമ പഞ്ചായത്ത് വൈസ് പ്രസിഡന്റ് മുരളി അവതരിപ്പിച്ചു. ഉല്പാദന മേഖലയ്ക്ക് പ്രാധാന്യം നൽകുന്ന ബഡ്ജറ്റാണിത്. ഇതിനായി 84,​97,​880 രൂപ നീക്കിവച്ചിട്ടുണ്ട്. കൂടാതെ സേവന മേഖലയ്ക്കായി 12,​17,​18,​100 രൂപയും പശ്ചാത്തല മേഖലയ്ക്കായി 1,​92,​11.000 രൂപയും ബജ​റ്റിൽ നീക്കിവച്ചു.

രാവിലെ 10.30 ന് ആരംഭിച്ച ബജ​റ്റ് യോഗത്തിൽ പഞ്ചായത്ത് പ്രസിഡന്റ് ആർ.എസ്. വിജയകുമാരി ആമുഖ പ്രസംഗം നടത്തി. ബജ​റ്റിൽ കാർഷിക മേഖലയ്ക്കും ഭവന നിർമ്മാണ മേഖലയ്ക്കും, മാലിന്യ നിർമ്മാർജ്ജനത്തിനും മുന്തിയ പരിഗണന നല്കുന്നതോടൊപ്പം എല്ലാ മേഖലകൾക്കും അർഹിക്കുന്ന പ്രധാന്യം നൽകിയിട്ടുണ്ടെന്ന് പ്രസിഡന്റ് പറഞ്ഞു. മൃഗസംരക്ഷണം ഉപജീവനമായി സ്വീകരിച്ച കർഷകർക്ക് കൈത്താങ്ങാകുന്ന തരത്തിലുള്ള പ്രത്യേക കന്നുക്കുട്ടി പരിപാലനം, കറവപ്പശുക്കൾക്ക് കാലിത്തീ​റ്റ, ക്ഷീര സമൃദ്ധി തുടങ്ങിയ പദ്ധതികൾക്കും ശാരീരിക മാനസിക വെല്ലുവിളി നേരിടുന്നവരെ കൈ പിടിച്ചുയർത്തുന്ന പദ്ധതികൾക്കും പട്ടികജാതി വിഭാഗത്തിൽപ്പെട്ടവർ‌ക്കായുള്ള ഭവന പദ്ധതികൾക്കും വയോജനങ്ങൾക്കായുള്ള പ്രത്യേക പ്രോജക്റ്റുകൾക്കും ബഡ്ജറ്റിൽ തുക വകകൊള്ളിച്ചിട്ടുണ്ട്.