കാട്ടാക്കട: പൊലീസ് സ്റ്റേഷൻ വളപ്പിലെ പാർക്കിംഗ് കേന്ദ്രം പൊട്ടിപൊളിഞ്ഞിട്ടും നവീകരിക്കുന്നില്ലെന്ന് പരാതി. നെയ്യാർഡാം വിനോദ സഞ്ചാര കേന്ദ്രത്തിലെ പൊലീസ് സ്റ്റേഷന് മുന്നിലെ പാർക്കിംഗ് കേന്ദ്രത്തിനാണ് ഈ ഗതികേട്. ദിനംപ്രതി നിരവധിയാളുകളെത്തുന്ന പൊലീസ് സ്റ്റേഷൻ വളപ്പിലെ ഷീറ്റ് മേഞ്ഞ ഷെഡ് തകർന്നിട്ട് ഏറെ നാളുകളായി. മേൽക്കൂരയാകെ പൊട്ടിപൊളിഞ്ഞ് ഷീറ്റുകൾ നിലംപൊത്തിതുടങ്ങി. പാർക്കിംഗ് ഷെഡ് ആണെങ്കിലും സ്റ്റേഷനിലെത്തുന്നവർ വിശ്രമിക്കുന്നത് ഇവിടെയാണ്. പൊട്ടി പൊളിഞ്ഞ ഷീറ്റുകളുടെ അവശിഷ്ടങ്ങൾ വിശ്രമകേന്ദ്രത്തിലിരിക്കുന്നവരുടെ മേലാണ് പലപ്പോഴും വീഴുന്നത്. ഷെഡ് നവീകരിക്കണമെന്നാശ്യപ്പെട്ട് നിരവധി തവണ അധികൃതർക്ക് നിവേദനങ്ങൾ നൽകിയെങ്കിലും യാതൊരു നടപടിയും ഉണ്ടായിട്ടില്ല.