തിരുവനന്തപുരം: വാട്സ് ആപ്പ് ഗ്രൂപ്പിലൊന്നിൽ എത്തിയ വീഡിയോയിൽ ലൂസിഫർ സ്റ്റൈലിൽ കൊറോണാ വൈറസിനെ തുരത്താനൊരുങ്ങുന്ന ആളെ കണ്ടപ്പോൾ സംവിധായകന് ആളെ എവിടെയോ കണ്ടപോലെ... പ്രൊഡക്ഷൻ എക്സിക്യൂട്ടിവിനെ വിളിച്ച് ആളാരെന്ന് തിരക്കി. ഒരു മാസം മുമ്പ് സിനിമയിൽ ചാൻസു ചോദിച്ചുവന്ന പൊലീസുകാരൻ! പേര് ജിബിൻ. ജിബിന്റെ നമ്പർ തപ്പിയെടുത്ത് വിളിച്ചു. ''വീഡിയോ കണ്ടു. സൂപ്പർ. അടുത്ത എന്റെ ചിത്രത്തിൽ നിങ്ങളുണ്ടാകും. കൊറാണക്കാലം കഴിയട്ടെ''. കുറച്ചുകഴിഞ്ഞ് പിന്നേയും വന്നു രണ്ട് സംവിധായകരുടെ ഫോൺകാൾ.

കൊറോണാ രോഗത്തിനെതിരെ ബോധവത്കരണവുമായി കേരള പൊലീസ് ഇറക്കിയ രണ്ടാമത്തെ വീഡിയോയിലെ നായകനാണ് ജിബിൻ ജി.നായർ. പാരയാകണ്ട എന്നു കരുതി,​ കിട്ടിയ ചാൻസുകൾ ഇപ്പോൾ ജിബിൻ വെളിപ്പെടുത്തുന്നില്ല.

കൊറോണ വൈറസ് ഒരു സാധാരണക്കാരനെ ആക്രമിച്ചു കീഴ്‌പ്പെടുത്താൻ വരുമ്പോൾ അയാൾ ചെറുത്ത് തോൽപ്പിക്കുന്നതാണ് വീഡിയോയുടെ പ്രമേയം. ആദ്യം വൈറസിനെ ഭയക്കുകയും പിന്നീട് ആരോഗ്യപ്രവർത്തകരുടെ സഹായത്തോടെ അതിനെ തുരത്തുന്നതുമാണ് വീഡിയോയിൽ അവതരിപ്പിച്ചിരിക്കുന്നത്. മോഹൻലാൽ ചിത്രമായ ലൂസിഫറിലെ ഒരു സൂപ്പർ ആക്ഷൻ സീനിന്റെ പശ്ചാത്തല സംഗീതത്തിനൊപ്പമാണിത്. 'ഈ കാലവും കടന്നുപോകും. ഇതും നമ്മൾ അതിജീവിക്കും' എന്ന സന്ദേശം കൂടി എ.ഡി.ജി.പി മനോജ് എബ്രഹാമിന്റെ ആശയത്തിൽ ഉരുത്തിരിഞ്ഞ ഈ വീഡിയോ മുന്നോട്ടു വയ്ക്കുന്നു.

ജിബിൻ ഇരുപതോളം സിനിമകളിൽ ചെറിയ വേഷങ്ങളിലെത്തിയിട്ടുണ്ട്. മഞ്ജുവാര്യർ കേന്ദ്രകഥാപാത്രമായ ഒരു സിനിമയിൽ പ്രാധാന്യമുള്ള വേഷം ലഭിച്ചതാണ്. വാഹനാപടത്തിൽ പരിക്കേറ്റതു കാരണം അത് നഷ്ടമായി. ബേസിൽ ജോസഫ് സംവിധാനം ചെയ്യുന്ന മിന്നൽ മുരളിയിലും രാജീവ് രവി സംവിധാനം ചെയ്യുന്ന കുറ്റവും ശിക്ഷയിലും ജിബിനുണ്ട്. കേരള പൊലീസ് സോഷ്യൽ മീഡിയ സെൽ അംഗമായ അരുൺ ബി.ടി ആണ് വീഡിയോ സംവിധായകൻ. വിഷ്ണുദാസ്, ഷെഹ്നാസ് എന്നിവരാണ് മറ്റ് അഭിനേതാക്കൾ. ഛായാഗ്രഹണം- രഞ്ജിത്ത്.

കൺട്രോൾറൂമിലെ കോൺസ്റ്റബിൾ ആയ ജിബിൻ കോലിയക്കോട് സ്വദേശിയാണ്. മാദ്ധ്യമ പ്രവർത്തകയായ ഹണിയാണ് ഭാര്യ. ഇരട്ടക്കുട്ടികൾ ഇഷാൻ, ഖയാൽ.