തിരുവനന്തപുരം: കൊറോണ പ്രതിരോധത്തിൽ സംസ്ഥാനത്തെ അടിയന്തര സാഹചര്യം കണക്കിലെടുത്ത് ആരോഗ്യ വകുപ്പിലെ അസിസ്റ്റന്റ് സർജൻ തസ്തികയിലേക്കുള്ള നിയമനം വേഗത്തിലാക്കാൻ പി.എസ്.സി തീരുമാനം. യുദ്ധകാലാടിസ്ഥാനത്തിൽ നിയമനശുപാർശകൾ കൈമാറുന്നതിന് ലഭ്യമായ ജീവനക്കാരെ വിന്ന്യസിക്കാൻ സെക്രട്ടറിയെ ചുമതലപ്പെടുത്തി.
അസിസ്റ്റന്റ് സർജൻ തസ്തികയിൽ 276 ഒഴിവുകളിൽ നിയമനശുപാർശ വകുപ്പ് ഡയറക്ടർക്ക് കൈമാറി. ഉദ്യോഗാർത്ഥികളെ അടിയന്തരമായി നിയമിക്കുന്നതിന് സഹായകമാകുന്ന രീതിയിൽ അവരുടെ ഫോൺ നമ്പർ കൂടി ഉൾപ്പെടുത്തിയാണിത്. ഒരു പ്രത്യേക വിഭാഗത്തെ വിനിയോഗിച്ചാണ് ഈ ജോലി പൂർത്തീകരിച്ചത്. നിയമന ശുപാർശ സംബന്ധിച്ച അറിയിപ്പ് ഉദ്യോഗാർത്ഥികൾക്ക് പ്രൊഫൈലിൽ നൽകും.
മെഡിക്കൽ വിദ്യാഭ്യാസ വകുപ്പിലെ 25 ജൂനിയർ ലാബ് അസിസ്റ്റന്റ്മാരുടെ നിയമനശുപാർശയും റേഡിയോഗ്രാഫർ ഗ്രേഡ് 2 തസ്തികയിലെ നിയമനശുപാർശയും ഉടൻ കൈമാറും.
വിവിധ ജില്ലകളിൽ മുനിസിപ്പൽ കോമൺ സർവീസിലെ ജൂനിയർ ഹെൽത്ത് ഇൻസ്‌പെക്ടർ ഗ്രേഡ് 2 തസ്തികയുടെ 346 ഒഴിവുകളിലേക്കുളള നിയമനശുപാർശയും വേഗത്തിലാക്കും,. ലഭ്യമായ ജീവനക്കാരെ വിന്ന്യസിച്ചുകൊണ്ട് റൊട്ടേഷൻ വേഗം തയ്യാറാക്കി നിയമനശുപാർശ കൈമാറാൻ ജില്ലാ ഒാഫീസർമാർക്ക് നിർദേശം നൽകി ..വിവിധ ജില്ലകളിൽ ആരോഗ്യവകുപ്പിലെ ലാബ് ടെക്നീഷ്യൻ ഗ്രേഡ് 2 തസ്തികയുടെ റാങ്ക് ലിസ്റ്റ് സോപാധികമായി പ്രസിദ്ധീകരിക്കാനും തീരുമാനിച്ചു.
റാങ്ക് ലിസ്റ്റിൽ ഉൾപ്പെട്ട ഉദ്യോഗാർത്ഥികളിൽ സർട്ടിഫിക്കറ്റുകൾ പരിശോധിക്കാൻ അവശേഷിക്കുന്നവരുടെ പരിശോധന പൂർത്തിയാക്കുന്ന മുറയ്ക്ക് അവരെ നിയമനശുപാർശ ചെയ്യാൻ ജില്ലാ ഓഫീസർമാരെ ചുമതലപ്പെടുത്തി. പ്രവർത്തിക്കാൻ കഴിയാത്ത ജില്ലാ ഓഫീസുകളിലെ നിയമനശുപാർശ തൊട്ടടുത്ത ജില്ലകളിലെ ജീവനക്കാരുടെ സഹായത്തോടെ നിർവഹിക്കാൻ ജില്ലാ ഓഫീസർമാർ നടപടികൾ സ്വീകരിക്കും. റാങ്ക് ലിസ്റ്റ് പ്രസിദ്ധീകരിച്ച് ഒരു നിശ്ചിത കാലാവധിക്കുശേഷം നിയമനശുപാർശ ചെയ്യുന്ന നിലവിലെ രീതിയിൽ മാറ്റം വരുത്തിയാണ് ഈ തസ്തികയുടെ നിയമനശുപാർശ നടത്തുന്നത്.