തിരുവനന്തപുരം: കൊറോണ പ്രതിരോധ പ്രവർത്തനങ്ങളുടെ ഏകോപനത്തിനായി ഓൺലൈൻ പോർട്ടൽ തുടങ്ങി. രോഗലക്ഷണവുമായി സ്വകാര്യ ആശുപത്രിയിലോ ഡോക്ടർമാരുടെ വീട്ടിലോ പരിശോധനയ്‌ക്കെത്തുന്നവരെ സംബന്ധിച്ച വിവരങ്ങൾ ആരോഗ്യ വകുപ്പിനെ അറിയിക്കാനാണ് www.fightcovid.online എന്ന വെബ് പോർട്ടൽ ആരംഭിച്ചത്.

രോഗികളെ കുറിച്ചുള്ള വിവരം ഇതിലൂടെ നൽകാം. അടിയന്തര ചികിത്സ വേണ്ട സാഹചര്യത്തിൽ 1077 എന്ന ടോൾ ഫ്രീ നമ്പറിൽ ബന്ധപ്പെട്ട് രോഗികൾക്ക് വേണ്ട അവശ്യ സംവിധാനങ്ങളും നിർദ്ദേശങ്ങളും ലഭ്യമാക്കാവുന്നതാണ്. ആംബുലൻസ് സൗകര്യമുൾപ്പെടെ ഇതിലൂടെ ലഭിക്കും. വെബ് പോർട്ടലിൽ കൃത്യമായി വിവരം നൽകാത്ത ആശുപത്രികൾക്കും സ്വകാര്യ ഡോക്ടർമാർക്കുമെതിരെ കർശന നടപടി ഉണ്ടാകും.

അലോപ്പതി, ഹോമിയോ, ആയുർവേദം, ഡെന്റൽ തുടങ്ങി എല്ലാ വിഭാഗക്കാരും എടുക്കേണ്ട മുൻകരുതലുകൾ സംബന്ധിച്ച് ആരോഗ്യ വകുപ്പിന്റെ സൈറ്റിൽ വിശദമായ നിർദേശമുണ്ട്. രോഗികളെ സ്വകാര്യ വാഹനത്തിൽ സർക്കാർ ആശുപത്രികളിലേക്ക് മാറ്റാതിരിക്കാൻ സ്വകാര്യ ആശുപത്രി അധികൃതർ ശ്രദ്ധിക്കണമെന്നും ആരോഗ്യവകുപ്പ് പുറത്തിറക്കിയ സർക്കുലറിൽ പറയുന്നു.