തിരുവനന്തപുരം: കൊറോണ ബാധയുടെ പശ്ചാത്തലത്തിൽ പൊലീസ് സ്റ്റേഷനുകളിലെ സേവനം ഡിജിറ്റലായി അഭ്യർത്ഥിക്കാൻ സംവിധാനം ഒരുക്കി കേരളാ പൊലീസ്. സ്റ്റേഷനുകളിലേയ്ക്ക് പൊതുജനങ്ങൾ നേരിട്ട് എത്തുന്നത് പരമാവധി ഒഴിവാക്കുന്നതിനാണ് ഈ തീരുമാനം. 'പൊലീസ് സേവനങ്ങൾ നിങ്ങളുടെ വീട്ടുവാതിൽക്കൽ' എന്ന് നാമകരണം ചെയ്തിരിക്കുന്ന ഈ പദ്ധതിപ്രകാരം പരാതികൾ, പൊലീസ് ക്ലിയറൻസ് സർട്ടിഫിക്കറ്റ് ഉൾപ്പെടെ അപേക്ഷകൾ ഇ-മെയിൽ, വാട്സ് ആപ്പ്, ഫോൺ തുടങ്ങിയവ മുഖേന നല്‍കാവുന്നതാണ്.

ഇങ്ങനെ ലഭിക്കുന്ന അപേക്ഷകളിൽ രസീത് നല്‍കി ഉടനടി നടപടി സ്വീകരിക്കും. കൈക്കൊണ്ട നടപടികൾ 48 മണിക്കൂറിനുള്ളിൽ തന്നെ അപേക്ഷകരെ അറിയിക്കുകയും ചെയ്യും. പദ്ധതിയുടെ ഭാഗമായി അതാത് പൊലീസ് സ്റ്റേഷനുകളിലെ ഇ-മെയിൽ വിലാസം, വാട്സ്ആപ്പ് നമ്പർ, ഫോൺ നമ്പർ എന്നിവയ്ക്ക് പരമാവധി പ്രചാരണം നല്‍കാൻ സംസ്ഥാന പൊലീസ് മേധാവി ലോക്നാഥ് ബെഹ്റ നിർദ്ദേശം നല്‍കിയിട്ടുണ്ട്.