 സ്പിരിറ്റ് എത്തിച്ചത് പാലക്കാട് വഴി

കായംകുളം:ഒറിജിനലിനെ വെല്ലുംവിധമാണ് കരീലക്കുളങ്ങരയിലെ കേന്ദ്രത്തിൽ വ്യാജമദ്യം ഉത്പാദിപ്പിച്ചിരുന്നതെന്ന് എക്സൈസ് പറഞ്ഞു. ഇത് കഴിക്കുന്നവർക്ക് പെട്ടെന്ന് വ്യത്യാസം

അനുഭവപ്പെടില്ല.

പാലക്കാട് ആലത്തൂർ ഭാഗത്തുള്ള മുൻ സ്പിരി​റ്റ് കേസ് പ്രതിയിൽ നിന്നാണ് മദ്യ നിർമ്മാണത്തിന് സ്പിരി​റ്റ് ലഭിച്ചതെന്ന് പ്രതി ഹാരിഷ് ജോൺ എക്സൈസിനോട് സമ്മതിച്ചു. ഗോവയിൽ നിന്നാണ് മദ്യ നിർമാണത്തിനാവശ്യമായ ഫ്‌ളേവറുകൾ എത്തിച്ചിരുന്നത്. വ്യാജ സ്​റ്റിക്കറുകൾ അച്ചടിച്ചിരുന്നത് ശിവകാശിയിലും. കഴിഞ്ഞ ഒന്നര വർഷമായി കരീലക്കുളങ്ങര കേന്ദ്രീകരിച്ച് വ്യാജ മദ്യനിർമാണ യൂണി​റ്റ് പ്രവർത്തിച്ചിരുന്നതായും പ്രതി സമ്മതിച്ചു. കൊവിഡ്-19 നിയന്ത്രണങ്ങളെ തുടർന്ന് സംസ്ഥാനത്തെ മദ്യശാലകൾ അടച്ചതോടെ വിപണന സാദ്ധ്യത വിപുലമായി.

നേരത്തേയും പിടിയിൽ

സ്പിരിറ്റുകാരുമായുള്ള ബന്ധത്തെ തുടർന്നാണ് എക്സൈസ് റേഞ്ച് ഓഫീസിൽ ഗാർഡായിരുന്ന ഹാരിഷ് ജോണിനെ പിരിച്ചുവിട്ടത്. 2004-ൽ ചെട്ടികുളങ്ങരയ്ക്ക് സമീപം കണ്ണമംഗലത്ത് വാടക വീട് കേന്ദ്രീകരിച്ച് വ്യാജമദ്യം നിർമ്മിച്ച കേസിലും ഇയാൾ പ്രതിയാണ്.ഒ.പി.ആർ റമ്മിന്റെ ഫ്ളേവറിലുള്ള 200 കുപ്പി വ്യാജമദ്യവും വിവിധ ബ്രാൻഡുകളുടെ നൂറു കണക്കിന് സ്റ്റിക്കറും മദ്യനിർമ്മാണത്തിന് ഉപയോഗിക്കുന്ന ഉപകരണങ്ങളും അന്ന് എക്സൈസ് പിടിച്ചെടുത്തിരുന്നു.