ആലപ്പുഴ: ലോക്ക് ഡൗൺ ലംഘിക്കുന്നവരെ കണ്ടെത്താൻ പൊലീസ് ഡ്രോണുകളുടെ സഹായം തേടിയിട്ടും കുറ്റക്കാരുടെ എണ്ണം വർദ്ധിക്കുന്നു. വീടുകളുടെ പരിസരത്തു കൂട്ടംകൂടുന്നവരുടെ ദൃശ്യങ്ങളും ഡ്രോണിന്റെ സഹായത്തോടെ പകർത്തി.

നിയമലംഘനത്തിന് ജില്ലയിൽ ഇന്നലെ 271 കേസുകൾ രജിസ്റ്റർ ചെയ്തു. 284 പേരെ പകർച്ചവ്യാധി നിയന്ത്രണ നിയമം അനുസരിച്ച് അറസ്റ്റു ചെയ്തു. 181 വാഹനങ്ങൾ പിടിച്ചെടുത്തു. ലോക്ക്ഡൗൺ ലംഘിച്ചതിന് 29 പേർക്കെതിരെയും റോഡരികിലും മറ്റ് സ്ഥലങ്ങളിലും നിന്നതിന് 9 കേസുകളിലായി 24 പേർക്കെതിരെയും, സത്യവാങ് മൂലം ഇല്ലാതെ യാത്രചെയ്തതിന് 15 പേർക്കെതിരെയും കേസെടുത്തു. വ്യാജചാരായ നിർമ്മാണത്തിന് മൂന്ന് പേർക്കും ചീട്ടുകളിസംഘത്തിലെ 13പേർക്കും അനുവാദം ഇല്ലാതെ കടകൾ തുറന്നതിന് അഞ്ചുപേർക്കുമെതിരെ കേസെടുത്തു. സർക്കാർ അനുമതിയില്ലാതെ കടകൾ തുറന്നാൽ ഉടമകൾക്ക് എതിരെ കേസെടുക്കുമെന്ന് ജില്ലാ പൊലീസ് മേധാവി ജെയിംസ് ജോസഫ് അറിയിച്ചു.