ആലപ്പുഴ: ലോക്ക് ഡൗൺ ലംഘിക്കുന്നവരെ കണ്ടെത്താൻ പൊലീസ് ഡ്രോണുകളുടെ സഹായം തേടിയിട്ടും കുറ്റക്കാരുടെ എണ്ണം വർദ്ധിക്കുന്നു. വീടുകളുടെ പരിസരത്തു കൂട്ടംകൂടുന്നവരുടെ ദൃശ്യങ്ങളും ഡ്രോണിന്റെ സഹായത്തോടെ പകർത്തി.

നിയമലംഘനത്തിന് ജില്ലയിൽ ഇന്നലെ 216 കേസുകൾ രജിസ്റ്റർ ചെയ്തു. 230 പേരെ പകർച്ചവ്യാധി നിയന്ത്രണ നിയമം അനുസരിച്ച് അറസ്റ്റു ചെയ്തു. 108 വാഹനങ്ങൾ പിടിച്ചെടുത്തു. ക്വാറന്റൈൻ ലംഘിച്ചതിന് ഒരാൾക്ക് എതിരെയും ലോക്ക്ഡൗൺ ലംഘിച്ചതിന് 23 പേർക്കെതിരെയും റോഡരികിലും മറ്റ് സ്ഥലങ്ങളിലും നിന്നതിന് ആറ് കേസുകളിലായി 21 പേർക്കെതിരെയും വ്യാജ സത്യവാങ്മൂലം ഉപയോഗിച്ച് യാത്ര ചെയ്തതിന് 22 പേർക്ക് എതിരെയും സത്യവാങ് മൂലം ഇല്ലാതെ യാത്രചെയ്തതിന് 17 പേർക്കെതിരെയുമാണ് കേസെടുത്തത്. വ്യാജചാരായ നിർമ്മാണത്തിന് എഴ് പേർക്കും ചീട്ടുകളിസംഘത്തിലെ 19പേർക്കും അനുവാദം ഇല്ലാതെ കടകൾ തുറന്നതിന് 12 പേർക്കുമെതിരെ കേസെടുത്തു.