മാവേലിക്കര: മാസ്‌കും സാനിട്ടൈസറും ഉപയോഗിക്കാൻ പ്രായോഗിക പരിജ്ഞാനം പോലുമില്ലാത്ത റോഡിൽ കഴിയുന്ന അഗതികൾക്ക് തുണയായി മാവേലിക്കര മോട്ടോർ വാഹനവകുപ്പ്. ഇവർക്ക് ആവശ്യമായ മാസ്‌ക്കും സാനിട്ടൈസറും വിതരണം ചെയ്തു. ഇവ ഉപയോഗിക്കുന്നതിനുള്ള പരിശീലനം നൽകുകയും ചെയ്തു. മാവേലിക്കര ജോയിന്റ് ആർ.ടി.ഒ എം.മനോജിന്റെ നേതൃത്വത്തിലാണ് നഗരത്തിലെ വിവിധയിടങ്ങളിൽ അഗതികൾക്ക് ബോധവത്കരണം നടത്തിയത്. ഇവർക്കായി സന്നദ്ധ സംഘടനകളുടെ സഹകരണത്തോടെ ഭക്ഷണ പൊതി വിതരണവും നടത്തി. എം.വി.ഐ എസ്.സുബി, എ.എം.വി.ഐ മാരായ എം.ശ്യാംകുമാർ, ജയറാം, സന്നദ്ധ പ്രവർത്തകരായ കെ.കെ.ബാബു, ബി.അഭിലാഷ്, മോഹൻ സിംഗ് എന്നിവരുടെ നേതൃത്വത്തിൽ വിവിധ സംഘങ്ങളായി തിരിഞ്ഞാണ് താലൂക്കിന്റെ വിവിധ ഭാഗങ്ങളിൽ കഴിയുന്ന അഗതികൾക്ക് മാസ്‌കും സാനിട്ടൈസറും നൽകിയത്.