മാവേലിക്കര: ​ വരേണിക്കൽ, ചെറുകുന്നം ആക്കപ്പള്ളി പാടശേഖരങ്ങളിലെ കർഷകർക്ക് ആഹ്ലാദം പകർന്ന് വിഷുത്തലേന്ന് കൊയ്ത്തിനായി യന്ത്രങ്ങളെത്തി. ആർ.രാജേഷ് എം.എൽ.എയുടെ ഇടപെടലിൽ ചെറിയനാട്ട് നിന്നാണ് കൊയ്ത്തു യന്ത്രങ്ങളെത്തിയത്. തിങ്കളാഴ്ച രാവിലെ 350 ഏക്കറിൽ കൊയ്ത്തുത്സവത്തിന് തുടക്കമായി.

നൂറ്റിയൻപത് കർഷകരുടെ സ്വപ്‌​നമായ കതിരുകൾ കൊയ്‌​തെടുക്കാൻ 15 ദിവസമെടുക്കുമെന്ന് വരേണിക്കൽ പാടശേഖര സമിതി സെക്രട്ടറി എസ് ആർ ശ്രീജിത്ത് പറഞ്ഞു. തെക്കേക്കര പഞ്ചായത്തിന്റെയും കൃഷിവകുപ്പിന്റെയും സഹകരണത്തോടെ നാലു മാസങ്ങൾക്ക് മുമ്പാണ് ഉമ ഇനത്തിലുള്ള നെൽവിത്തുകൾ വിതച്ചത്. കൊവിഡ്​19 ന്റെ നിയന്ത്രണങ്ങൾ പാലിച്ചാണ് കൊയ്ത്തിന് തുടക്കമായത്. തെക്കേക്കര ഗ്രാമപഞ്ചായത്ത് പ്രസിഡന്റ് ഷൈലാ ലക്ഷ്മണൻ, വൈസ് പ്രസിഡന്റ് ടി വിശ്വനാഥൻ, മാവേലിക്കര കൃഷി അസി.ഡയറക്ടർ സി.ആർ രശ്മി എന്നിവർ കൊയ്ത്തുത്സവത്തിന് എത്തി.