ചേർത്തല:ലോക്ക് ഡൗൺ കാലം വായനയുടെ പൂക്കാലമാക്കുക എന്ന സന്ദേശവുമായി പ്രദേശത്തെ വീടുകളിൽ വെട്ടയ്ക്കൽ ശ്രീചിത്രോദയ വായനശാല പുസ്തകങ്ങൾ എത്തിച്ച് നൽകുന്നു. ഫോൺ വിളിച്ച് പറയുന്നത് പ്രകാരം വായനശാല വൈസ് പ്രസിഡന്റ് കെ.ബി.റഫീക്കും കമ്മി​റ്റിയംഗം എൻ.എൻ.നിധീഷും നേതൃത്വം നൽകുന്ന കമ്മി​റ്റി പുസ്തകങ്ങൾ വായനക്കാർക്ക് എത്തിച്ച് നൽകും. വായിക്കുന്ന പുസ്തകങ്ങളുടെ ആസ്വാദനകുറിപ്പ് തയ്യാറാക്കുന്ന മത്സരവും ഇതിനോടനുബന്ധിച്ച് സംഘടിപ്പിക്കുന്നുണ്ട്. ബാലവേദി,വനിതാവേദി,യുവത,കരിയർ ഗൈഡൻസ് സെന്റർ തുടങ്ങിയവ വായനശാലയുടെ കീഴിൽ പ്രവർത്തിക്കുന്നു.കെ.ഡി. ജസ്മലാൽ (പ്രസിഡന്റ്),വി.എം. നിഷാദ് (സെക്രട്ടറി) എന്നിവരുടെ നേതൃത്വത്തിലുള്ള കമ്മിറ്റിയാണ് പ്രവർത്തനങ്ങൾക്ക് നേതൃത്വം നൽകുന്നത്.