ആലപ്പുഴ: കൊവിഡ് പ്രതിരോധ പ്രവർത്തനങ്ങളിൽ ഏർപ്പെട്ടിരിക്കുന്നവർക്ക് ആദരവുമായി ഇന്ത്യയിലെ പതിനായിരത്തോളം മാന്ത്രികർ സാമൂഹിക മാദ്ധ്യമങ്ങളിൽ ഒരേ സമയം പ്രകടനങ്ങൾ കാഴ്ചവച്ചു. ഇന്നലെ വൈകിട്ട് നാലുമണിക്കാണ് ഒരു മിനിറ്റ് ദൈർഘ്യമുള്ള മാജിക്ക് പ്രകടനങ്ങൾ അരങ്ങേറിയത്.

മാജിക്ക് റിയലിസം എന്ന സംഘടനയുടെ നേതൃത്വത്തിൽ 'എന്റെ മാജിക്ക് ലോക നന്മയ്ക്കായി' എന്ന പേരിലാണ് ആദരമൊരുക്കിയത്. ഫേസ് ബുക്ക്, വാട്സാപ്പ്, ഇൻസ്റ്റാഗ്രാം, യൂട്യൂബ് തുടങ്ങിയ മാദ്ധ്യമങ്ങളിലായിരുന്നു പ്രകടനം. കൊവിഡ് പ്രതിരോധ പ്രവർത്തകർക്ക് ആദരവിനൊപ്പം വീടുകളിൽ അകപ്പെട്ടു കഴിയുന്നവർക്ക് മാനസികോല്ലാസത്തിനുള്ള അവസരവുമായി മാജിക്ക് റിയലിസം പരിപാടി.