കായംകുളം: വധശ്രമക്കേസുകളിലെ പ്രതിയായ ഡി.വൈ.എഫ്.ഐ നേതാവിനെ അറസ്റ്റ് ചെയ്യാൻ തോക്കുമായി സി​. ഐ രാത്രി വീട് റെയ്ഡ് ചെയ്തതോടെ കായംകുളത്തെ പൊലീസും ഡി​.വൈ. എഫ്. ഐയുമായുള്ള വൈരം പുതി​യ തലത്തി​ലേയ്ക്ക്. ഇന്നലെ ഡി.വൈ.എഫ്.ഐ കായംകുളം ബ്ളോക്ക് സെക്രട്ടറി റഫീക്ക് ജില്ലാ കളക്ടർക്കും ഡി.ജി.പിക്കും സി​. ഐ ഗോപകുമാറിനെതിരെ പരാതി നൽകി.

27 ന് വൈകിട്ട് ലീവെടുത്ത സി.ഐ അയൽ ജി​ല്ലയായ കോട്ടയത്തുള്ള വീട്ടിലേയ്ക്ക് പോയെന്നും യാത്രയ്ക്ക് അനുമതി തേടിയിട്ടുണ്ടോ എന്ന് പരിശോധിക്കണമെന്നുമാണ് ആവശ്യം. എന്നാൽ ലോക്ക് ഡൗൺ മാനദണ്ഡങ്ങൾ പാലിച്ചിട്ടുണ്ടന്നാണ് ജില്ലാ പൊലീസ് ചീഫിന് ലഭിച്ച റിപ്പോർട്ടെന്നാണ് വി​വരം.

വധശ്രമകേസുകൾ ഉൾപ്പെടെ പത്തോളം ക്രിമിനൽ കേസുകളിൽ പ്രതിയായ ഡി.വൈ.എഫ്.ഐ നേതാവ് സാജിദിന്റെ ഒന്നാം കുറ്റിയിലെ വാടക വീട്ടിലാണ് 25 ന് രാത്രി സി.ഐ എത്തിയത്. തോക്കുമായി​​ വന്ന സി.ഐ മുഖാവരണം ധരിച്ചിരുന്നില്ലെന്നുമാണ് പരാതി നൽകിയത്. എന്നാൽ കൊടും ക്രിമിനലിനെ പി​ടിക്കാൻ തോക്കുമായി രാത്രി പോയതിൽ തെറ്റില്ലെന്നാണ് ജില്ലാ പൊലീസ് ചീഫി​ന്റെ പ്രതി​കരണം. ഇത് സംബന്ധിച്ച് ഡിവൈ.എസ്.പി അന്വേഷിച്ച് റിപ്പോർട്ട് നൽകിയിട്ടുണ്ടെന്നും അദ്ദേഹം പറഞ്ഞു.

ഹെൽമറ്റ് വയ്ക്കാതെ ബൈക്കിലെത്തിയ കായംകുളം നഗരസഭ ചെയർമാനും സി.പി.എം നേതാവുമായ എൻ.ശിവദാസനോട് പെറ്റി അടയ്ക്കാൻ പറഞ്ഞ സി.ഐയുടെ നടപടി​ വാർത്തയായിരുന്നു. ഇതോടെയാണ് സി​.ഐ പലരുടെയും കണ്ണി​ലെ കരടായതത്രെ. കഴിഞ്ഞ ദിവസങ്ങളിൽ സി.ഐയുടെ നേതൃത്വത്തിൽ സസ്യ മാർക്കറ്റിൽ വാഹനങ്ങളിൽ നിന്നും സാധനങ്ങൾ ഇറക്കുന്നതിനും മറ്റും നടത്തിയ നടപടികളും ചിലർക്ക് അതൃപ്തിയ്ക്ക് കാരണമായെന്ന് റി​പ്പോർട്ടുണ്ട്.