കൊച്ചി: ലോക്ക് ഡൗണിന്റെ മറവിൽ വ്യാപാര സ്ഥാപനത്തിൽ മോഷണശ്രമം. തമിഴ്‌നാട് സ്വദേശി
പിടിയിൽ.വാഴക്കുളം വേങ്ങച്ചുവട് ഭാഗത്തുള്ള കടയിൽ ഇന്നലെ രാത്രിയാണ് മോഷണശ്രമം നടന്നത്. തമിഴ്‌നാട്ടുകാരനായ രാജപാണ്ഡ്യയാണ് പൊലീസിന്റെ പിടിയിലായത്. കടയുടെ പുറകുവശത്തെ തടിയുടെ വാതിൽ കുത്തിത്തുറക്കാൻ ശ്രമിച്ചതായി ശ്രദ്ധയിൽപ്പെട്ട കടയുടമ പൊലീസിൽ പരാതി നൽകുകയായിരുന്നു.

തുടർന്ന് വാഴക്കുളം പൊലീസ് ഇൻസ്‌പെക്ടർ എസ്. അജയകുമാറിന്റെ നേതൃത്വത്തിൽ നടത്തിയ അന്വേഷണത്തിൽ പ്രതിയെ ആനിക്കാട് കമ്പനിപ്പടി ഭാഗത്ത് നിന്നും അറസ്റ്റ് ചെയ്യുകയായിരുന്നു. ഇന്നലെ പുലർച്ചെയാണ് വാഴക്കുളത്ത് വന്നതെന്ന് ചോദ്യം ചെയ്യലിൽ പ്രതി സമ്മതിച്ചതായി പൊലീസ് പറഞ്ഞു. ഇയാൾ കൂടുതലായി മറ്റെവിടെങ്കിലും മോഷണം നടത്തിട്ടുണ്ടോയെന്ന് അന്വേഷണം നടത്തിവരികയാണ്.