കൊച്ചി: സപ്‌ളൈകോയുടെ നേതൃത്വത്തിൽ ജില്ലാ ഭരണകൂടത്തിന്റെ സഹകരണത്തോടെ ട്രക്ക് ഡ്രൈവർമാർക്ക് സൗജന്യ ഭക്ഷണപ്പൊതിയും വെള്ളവും നൽകുന്ന സംരംഭത്തിന്റെ ഉദ്ഘാടനം ഇടപ്പള്ളി മെട്രോ സ്റ്റേഷൻ പരിസരത്ത് കളക്‌ടർ എസ്. സുഹാസ് നിർവഹിച്ചു. സപ്ലൈകോ സി.എം.ഡി.പി.എം.അലി അസ്ഗർ പാഷ അദ്ധ്യക്ഷത വഹിച്ചു. സംസ്ഥാനത്ത് ചരക്കുമായെത്തുന്ന ട്രക്ക് ഡ്രൈവർമാർക്ക് ഇവിടെ നിന്ന് ഉച്ചയ്ക്ക് 12 മുതൽ വൈകിട്ട് മൂന്നുവരെ ഭക്ഷണപ്പൊതിയും വെള്ളവും ലഭിക്കും. 150 പേർക്ക് ഇന്നലെ ഭക്ഷണം നൽകി. ആവശ്യമനുസരിച്ച് ഊണ്, ചപ്പാത്തി, പൊറോട്ട, വെജിറ്റബിൾ കറി എന്നിവ അടങ്ങിയ ഭക്ഷണപ്പൊതികളാണ് വിതരണം ചെയ്‌തത്.