മനാമ: ഒരാഴ്ച മുമ്പ് വരെ പാർക്കിംഗ് കേന്ദ്രം. ഇന്ന് 130 ബെഡുള്ള അത്യാധുനിക ഐ.സി.യു. ബഹ്‌റൈൻ ഡിഫൻസ് ഫോഴ്‌സ് (ബി.ഡി.എഫ്) ആശുപത്രിയിലെ മൂന്നാം നിലയിലെ പാർക്കിംഗ് ഏരിയയാണ് ഐ.സി.യുവാക്കി മാറ്റിയത്. ഏഴ് ദിവസത്തെ പ്രയത്‌നത്തിലൂടയൊണ് 130 പേരെ ഒരേസമയം ചികിത്സിക്കാനുള്ള ഐ.സി.യു നിർമിച്ചത്.

കൊവിഡ് വ്യാപിക്കുന്ന സാഹചര്യത്തിൽ ചികിത്സാ സംവിധാനങ്ങളുടെ ലഭ്യത ഉറപ്പ് വരുത്തുന്നതിന്റെ ഭാഗമാണ് തീവ്ര പരിചരണ വിഭാഗം സജ്ജീകരിച്ചത്. ലോകത്ത് നിലവിലുള്ള ഏറ്റവും മികച്ച സൗകര്യങ്ങളോടുകൂടിയ അത്യാധുനിക ഐ.സി.യുവാണ് ഡിഫൻസ് ഫോഴ്‌സ് ഹോസ്പിറ്റലിലെ പാർക്കിംഗ് ഏരിയയിൽ ഒരുക്കിയിരിക്കുന്നതെന്ന് ഹെൽത്ത് സൂപ്രിം കൗൺസിൽ പ്രസിഡന്റ് ഡോ. ഷെയ്ഖ് മുഹമ്മദ് ബിൻ അബ്ദുല്ല അൽ ഖലീഫ വ്യക്തമാക്കി. രാജ്യത്തെ ആശുപത്രികളിൽ കൊവിഡ് ചികിത്സക്കായി അടിയന്തരമായി 500 ബെഡുകൾ സജ്ജമാക്കുമെന്നും അദ്ദേഹം അറിയിച്ചു.