ചെന്നൈ: ചിറ്റൂർ ജില്ലയിലെ തമിഴ്‌നാട്-ആന്ധ്ര അതിർത്തിയിൽ വാഹനങ്ങൾ തടയാൻ മതിൽ നിർമിച്ചു. രാജ്യത്ത് കൊറോണ വൈറസ് പൂട്ടിയിട്ടിരിക്കെ വാഹനങ്ങളുടെ വരവ് തടയാനാണ് തമിഴ്‌നാട് സർക്കാർ ആന്ധ്രയുടെ അതിർത്തിയിൽ റോഡുകൾക്ക് കുറുകെ മതിലുകൾ കെട്ടിപൊക്കിയത്. 7 അടി ഉയരത്തിൽ നിർമ്മിച്ച മതിലുകൾ ചിറ്റൂർ-പൊന്നി-ചെന്നൈ റോഡിലും ചിറ്റൂർ ജില്ലയിലെ ചിറ്റൂർ-ഗുഡിയാത്തം റോഡിലുമുള്ള രണ്ട് പ്രധാന പ്രവേശന കവാടങ്ങളിലുമാണ് നിർമിച്ചിട്ടുള്ളത്. രണ്ടാം ഘട്ട ലോക്ക്ഡൗണിന്റെ പശ്ചാത്തലത്തിൽ വാഹനങ്ങൾ നിയന്ത്രിക്കുന്നതിനാണ് ആന്ധ്ര അതിർത്തിയിൽ മതിലുകൾ നിർമിക്കാൻ തീരുമാനിച്ചത്.

അതിർത്തി പ്രദേശങ്ങളിൽ കേന്ദ്ര-സംസ്ഥാന സർക്കാരുകൾ ഇതിനകം തന്നെ നിയന്ത്രണങ്ങൾ ഏർപ്പെടുത്തിയിട്ടുണ്ട്, അവശ്യ സേവനങ്ങൾ ഒഴികെ ഒരു വാഹനവും ഇതിലൂടെ അനുവദനീയമല്ല. കൊവിഡ് വൈറസ് കേസുകളിൽ കൂടുതൽ വർദ്ധനവ് ഉണ്ടാകാതിരിക്കാൻ നിയമപ്രകാരമാണ് നടപടി സ്വീകരിച്ചതെന്ന് സർക്കാർ വൃത്തങ്ങൾ പറഞ്ഞു. തമിഴ്‌നാട്ടിലും ആന്ധ്രയിലും ആയിരത്തിലധികം കൊവിഡ് വൈറസ് കേസുകൾ ഇതുവരെ റിപ്പോർട്ട് ചെയ്തിട്ടുണ്ട്. തമിഴ്‌നാട്ടിൽ 1,885 കൊവിഡ് -19 കേസുകൾ റിപ്പോർട്ട് ചെയ്തപ്പോൾ ആന്ധ്രാപ്രദേശിൽ 1,097 കേസുകൾ റിപ്പോർട്ട് ചെയ്യപ്പെട്ടിട്ടുണ്ട്. സംസ്ഥാനത്തെ വിവിധ ആശുപത്രികളിൽ നിന്ന് 60 പേരെ ഡിസ്ചാർജ് ചെയ്തതിനെത്തുടർന്ന് രോഗം ഭേദമായ കൊവിഡ് -19 രോഗികളുടെ എണ്ണം ഞായറാഴ്ച തമിഴ്‌നാട്ടിൽ ആയിരത്തിലെത്തി. അതേസമയം, ആന്ധ്രയിൽ കൊവിഡ് വൈറസ് കേസുകളുടെ കുതിപ്പ് തുടരുകയാണ്. 231 രോഗികൾ ഇതുവരെ വിവിധ ജില്ലകളിലെ ആശുപത്രികളിൽ നിന്ന് സുഖം പ്രാപിച്ചു.